काठमाडौं – नेपाली कांग्रेसले बुधबार हुने राष्ट्रियसभा चुनावका लागि आफ्ना पार्टीका मतदातालाई सोमबारभित्र मतदान स्थलमा पुग्न निर्देशन दिएको छ ।
कांग्रेस पार्टी कार्यालयका मुख्य सचिव कृष्णप्रसाद पौडेलका अनुसार सोमबारभित्र आफ्नो मतदानस्थलमा पुगिसक्न निर्देशन दिइएको जानकारी दिए ।
कांग्रेसले राष्ट्रियसभा चुनावमा प्रदेशसभाका सदस्य र स्थानीय तहका नगरपालिकाका प्रमुख एवं उपप्रमुख र गाउँपालिकाका अध्यक्ष एवं उपाध्यक्षलाई जहाँ भए पनि २२ गतेसम्म मतदानस्थलमा पुग्न निर्देशन दिएको हो ।
कांग्रेसले जारी गरेको विज्ञप्तिमा भनिएको छ, ‘स्वदेश तथा विदेश जहाँ रहनु भएको भएता पनि २२ गते भित्र आफ्नो प्रदेशको मतदान स्थलमा उपस्थित हुनुहुन, पार्टी एवं राष्ट्रिय सभाका उम्मेदवारहरुसँग निरन्तर सम्पर्कमा रहिरहनुहुन र २४ गते आ–आफ्नो प्रदेशको मतदान स्थलमा हुने राष्ट्रिय सभाको निर्वाचनमा अनिवार्य उपस्थित भई पार्टीको आधिकारिक उम्मेदवारहरुलाई मतदान गर्नु हुन नेपाली कांग्रेस निर्देशन गर्दछ ।’
राष्ट्रियसभा चुनावमा स्थानीय तहका प्रतिनिधिको मतभार १८ र प्रदेशसभा सदस्यको मतभार ४८ हुने कानुनी व्यवस्था छ । निर्वाचन आयोगले सातवटै प्रदेशमा निर्वाचन अधिकृतको कार्यालय स्थपना गरेर तयारी पूरा भइसकेको जनाएको छ ।
राष्ट्रियसभाको चुनाव एक संक्रमणीय निर्वाचन प्रणालीअनुसार हुँदैछ ।
भर्खरै
लोकप्रिय
