विराटनगर- मनाङ मर्स्याङ्दी क्लबलाई एक शून्यले स्तब्ध बनाउँदै काठमाडौंको संकटा क्लब बुढासुब्बा गोल्डकप प्रतियोगिताको सेमिफाइनलमा प्रवेश गरेको छ।
धरान रंगशालामा शनिबार सुरु भएको प्रतियोगिताको पहिलो खेलमै पराजित हुँदै पूर्व विजेता मनाङ बुढासुब्बा गोल्डकपको २० औं संस्करणबाट बाहिरिएको छ। धरान रंगशाला पुनर्निर्माणपछि पहिलोपटक आयोजित प्रतियोगिताको पहिलो हाफ रोमान्चक बनेको थियो।
साविक उपविजेता टोली संकटाले मनाङलाई पहिलो हाफमा निकै दबाबमा राखेको थियो। यद्धपि संकटाका लागि खेलको ७५ औं मिनेटमा अर्नेष्टले गरेको गोल नै निर्णायक बन्न पुग्यो। संकटाको जितमा निर्णायक बनेका अर्नेष्टलाई धरान उपमहानगरपालिका प्रमुख तारा सुब्बाले म्यान अफ दि म्याचले पुरस्कृत गरेका थिए। जित हात पारेको संकटाले सेमिफाइनलमा नेपाल पुलिस क्लब र झापाको के.एफ.टी.सी ११ बीचको विजयी टोलीसँग बुधबार स्पर्धा गर्नेछ।
प्रतियोगिता उद्घाटनसँगै सांस्कृतिक कार्यक्रम राखिएका कारण खेल निर्धारित समयभन्दा करिब ४५ मिनेट ढिलो गरी सुरु भएको थियो। यसका कारण खेल ८० मिनेटमा सीमित गरिएको राष्ट्रिय रेफ्री मदन काफ्लेले जानकारी दिए। प्रतियोगिता अन्तर्गत आइतबार समूह बी मा रहेको भारतको दुर्गापुरी स्टिल क्लबले आयोजक धरान फुटबल क्लबको सामना गर्नेछ।
भर्खरै
लोकप्रिय
