बार्सिलोना स्पेनिस कोपा डेल रे फुटबल प्रतियोगिताको फाइनलमा पुगेको छ । अवे मैदानमा बिहीबार राति भएको सेमिफाइनलको दोस्रो लेगमा भ्यालेन्सियालाई २–० ले हराउँदै समग्रमा ३–० को जितसहित साबिक विजेता बार्सिलोना कोपा डेल रेको फाइनलमा पुगेको हो ।
पहिलो लेगमा १–० ले विजयी भएको बार्सिलोना दोस्रो लेगमा पनि जित निकाल्दै लगातार पाँचौँ सिजन कोपा डेल रेको फाइनलमा पुग्ने पहिलो टिम बनेको छ ।
बार्सिलोनाको जितमा क्लबकोक कीर्तिमानी मूल्य १४२ मिलियन पाउण्डमा गएको जनवरीमा आएका फिलिप कोन्टिन्होले गोल गरे । उनले बार्सिलोनाबाट पहिलो गोल गरेका हुन् ।
पहिलो हाफमा गोल रहित बराबरी भएको खेलमा दुवै गोल दोस्रो हाफमा भएको हो । ४९ औँ मिनेटमा कोन्टिन्होले गोल गर्दै बार्सिलोनालाई सुरुवाति अग्रता दिलाए । उनले बार्सिलोनाबाट पाँचौँ खेलमा पहिलो गोल गरेका हुन् ।
८२ औँ मिनेटमा इभान रेकिटिकले गोल गर्दै २–० को जित दिलाए । बार्सिलोनाले फाइनलमा सेभिल्लासँग प्रतिस्पर्धा गर्नेछ । लेगानेसलाई समग्रमा ३–१ ले हराउँदै सेभिल्लाले फाइनलमा स्थान बनाएको हो ।
फाइनल खेल आउँदो अप्रिल २१ मा हुनेछ । सेभिल्ला सन् २०१६ मा फाइनलमा बार्सिलोनासँगै हारेको थियो । बार्सिलोनाले भने सन् २०१४ मा रियल मड्रिडसँग पराजित भएपछिका तीन वर्ष लगातार उपाधि जितेको छ ।
भर्खरै
लोकप्रिय
