काठमाडौं – पूर्व डिआइजी नवराज सिलवालविरुद्ध कीर्ते अभियोगको सम्बन्धमा अनुसन्धान गरिरहेको प्रहरीले रायसहितको प्रतिवेदन बुझाएको छ ।
अनुसन्धानका लागि तोकिएको प्रहरीको टोलीले अनुसन्धान पूरा गरी रायसहितको प्रतिवेदन सरकारी वकिलको कार्यालयलाई बुझाएको छ । बुधबार बिहान प्रहरीले सरकारी वकिलको कार्यालयमा प्रतिवेदन बुझाएको सरकारी वकिलको कार्यालयका प्रमुख सूर्यराज दाहालले जानकारी दिए ।
प्रहरीले बुझाएको प्रतिवेदन अध्ययन भइरहेको प्रमुख दाहालले जानकारी दिए । प्रतिवेदन अध्ययन गरेर मात्रै मुद्दा दर्ता गर्न पर्ने या नपर्ने निर्णय गरिने उनले बताए । सरकारी वकिलको कार्यालयले प्रतिवेदनअनुसार मुद्दा दर्ता गर्नुपर्ने देखिएमा मात्र सिलवालको फाइल मुद्दाका लागि अगाडि बढाउने छ ।
आफूलाई प्रहरी महानिरीक्षक बनाउनुपर्ने दाबीसहित सिलवालले सर्वोच्च अदालतमा दायर गरेको रिट खारेजीसँगै प्रहरी प्रधान कार्यालयले सिलवाललाई कानुन बमोजिम गोप्य रहनुपर्ने कार्यसम्पादन मूल्याङ्कन फाइल कीर्ते गरेको अभियोगमा अनुसन्धान गर्ने निर्णय गरेको थियो । सर्वोच्व अदालतको फैसला अनुसार नै प्रहरीले गएको पुस ५ गते कीर्ते गरेको अभियोगमा जाहेरी दर्ता भएको थियो ।
जाहेरी दर्ता गरेदेखि सिलवाल प्रहरीको खोजी सूचिमा छन् । प्रहरीले डिफ्युजन नोटिस नै जारी गरी सिलवाललाई खोजी गरिरहे पनि उनी अहिले पनि फरार छन् ।
ललितपुर क्षेत्र नम्बर १ बाट प्रतिनिधिसभा सदस्यमा निर्वाचितसिलवालले आफूले विभिन्न सञ्चारमाध्यममा आएको समाचारमा आधारित भएर कासमु फाइल बुझाएको बताउने गरेका छन् ।
सम्बन्धित समाचार
पुर्व डीअाइजी सिलवालविरुद्ध डिफ्युजन नाेटिस
भर्खरै
लोकप्रिय
