कायरो-इजिप्टमा वर्तमान सरकारद्वारा प्रतिबन्धित घोषणा गरिएको एक राजनीतिक दल मुिस्लम ब्रदरहुडलाई सहयोग गरेको अभियोगमा यहाँका २० जना विद्यार्थीलाई जेल सजाय सुनाएको घटनाको विरोध भएको छ ।
यहाँका मानवअधिकारवादीहरुले त्यसको विरोध गरेका हुन् । इजिप्टको एक अदालतले केही हप्तामात्र अघि उनीहरुलाई पाँच वर्षको जेल सजाय सुनाएको थियो ।
इस्लाम केन्द्रीत एक विश्वविद्यालयका ती विद्यार्थीलाई सुनाइएको यो फैसला राजनीतिक आस्थाका आधारमा गरिएको भन्दै त्यसको विरोध गरिएको हो ।
इजिप्टको सरकारी समाचार संस्था मेनाले जनाएअनुसार उक्त विश्वविद्यालय इजिप्टका अपदस्थ पूर्व इस्लामी राष्ट्रपति मोहमद मोर्सीसँग सम्वन्धित छ । त्यसैले वर्तमान सरकारले उक्त विश्वविद्यालयलाई प्रतिबन्ध लगाएको थियो ।
ती विद्यार्थीहरुले उक्त प्रतिबन्धित विश्वविद्यालयबाट मोर्सीको पार्टीलाई समर्थन गर्ने काम गरेको आरोप उक्त अदालतको छ । तर त्यस आरोपको उनीहरुले भने खण्डन गरेका छन् ।
इजिप्टका मानवअधिकारवादीले उक्त विश्वविद्यालयका विद्यार्थीलाई शान्तिपूर्णरुपमा विरोध गरेको आरोपमा यसरी वर्षौँको जेल सजाय सुनाउनु न्यायसंगत नभएको र उनीहरुको विचार तथा अभिव्यक्ति स्वतन्त्रताको हनन् भएको बताएका छन् ।
इजिप्टका पूर्वराष्ट्रपति मोर्सीलाई सन् २०१३ को जुलाईमा अपदस्थ गरिएको थियो । त्यस समयमा उहाँको समर्थनमा आम प्रदर्शन भएका थिए । उहाँको पक्षमा गरिएका भनिएका यी प्रदर्शनका बारेमा पछिसम्म नै सरकारले खोजी गरिरहेको छ ।
भर्खरै
लोकप्रिय
