म्यानचेस्टर युनाइटेड एफए कप फुटबलको क्वाटरफाइनलमा प्रवेश गरेको छ । प्रि–क्वाटरफाइनल अन्तर्गत शनिबार राति भएको खेलमा हडर्ल्सफिल्ड टाउनलाई २–० ले हराउँदै जोसे मोरिन्होको टिम म्यानचेस्टर युनाइटेड एफए कपको अन्तिम ८ मा पुगेको हो ।
अवे मैदानमा भएको खेलमा म्यानचेस्टर युनाइटेडलाई जिताउन दुवै गोल रामेलु लुकाकुले गरे । लुकाकुले तेस्रो मिनेटमा नै आन माटाको पासमा गोल गर्दै टिमलाई सुरुवाति अग्रता दिलाए ।
यस्तै उनले ५५ औँ मिनेटमा एलेक्स सान्चेजको पासमा गोल गर्दै टिमको अग्रता दोब्बर पारे । लुकाकुले यो सिजन २१ गोल गरिसकेका छन् ।
पहिलो हाफको अन्तिम सयममा माटाले गोल गरेका थिए । भिडियो एसिस्टेन्ट रेफ्रीको सहायतामा रेफ्रीले अफसाइड भन्दै उनको गोललाई मान्यता दिएनन् । मोरिन्होको टिमले अब क्वाटरफाइनलमा ब्राइटनसँग प्रतिस्पर्धा गर्नेछ ।
शनिबार राति नै भएको खेलमा कोवेन्ट्रीलाई ३–१ ले हराएर ब्राइटनले पनि अन्तिम ८ मा स्थान पक्का गरेको छ । यस्तै राति नै भएको खेलमा वेष्ट ब्रोमलाई २–१ ले हराउँदै साउथह्याम्पटनले पनि अन्तिम ८ मा स्थान पक्का गरेको छ ।
तर शेफिल्ड वेइनस्डेसँग गोल रहित बराबरी खेलेको स्वान्सी सिटीले क्वाटरफाइनल प्रवेशका लागि आउँदो बुधबार रि–प्ले खेल्नु पर्ने भएको छ ।
भर्खरै
लोकप्रिय
