स्पेनिस ला लिगा फुटबलमा पछिल्ला खेलमा साबिक विजेता रियल मड्रिडले आफ्नो पुरानो लय लिएको छ । लिग अन्तर्गत आइतबार राति भएको खेलमा जिनेदिन जिदानको टिम रियल मड्रिडले रियल बेटिसमाथि ५–३ को प्रभावशाली जित दर्ता गर्यो ।
रियलको जितमा मार्को एसेन्सिओले दुई गोल गरे । यस्तै सजिर्यो रामोस, क्रिष्टियानो रोनाल्डो र करिम बेन्जिमाले एक एक गोल गरे । रियल बेटिसका लागि एइसा मोन्डी र सर्जियो लियोनले गोल गरे । यस्तै रियल मड्रिडका नाचोले आत्मघाती गोल गरे ।
च्याम्पियन्स लिग फुटबल अन्तर्गत १६ को पहिलो लेगमा पेरिस सेन्ट–जर्मेन (पिएसजी) सँग सुरुमा पछि परेर पनि जित निकालेको रियल मड्रिडले त्यसपछि भएको पहिलो घरेलु लिगमा पनि पहिलो हाफमा पछि पर्यो ।
११ औँ मिनेटमा एसेन्सिओको गोलबाट रियलले अग्रता लिएको थियो । तर ३३ औँ मिनेटमा मोन्डीले रियल बेटिसका लागि बराबरी गोल गरे । त्यसको चार मिनेटपछि नाचोले आत्मघाती गोल गर्दै पहिलो हाफमा रियल बेटिसलाई २–१ को अग्रता दिलाए ।
तर रियल मड्रिडले दोस्रो हाफमा थप चार गोल गर्यो। ५० औँ मिनेटमा रामोस तथा ५९ औँ मिनेटमा एसेन्सिओले व्यक्तिगत दोस्रो गोल गरेपछि रियलले ३–२ को अग्रता लियो ।
रोनाल्डोले ६५ औँ मिनेटमा गोल गर्दै अग्रता बढाए । ८५ औँ मिनेटमा लियोनले रियल बेटिसका लागि थप एक गोल गरे । इन्जुरी समयको दोस्रो मिनेटमा बेन्जिमाले गोल गरेपछि रियल मड्रिड ५–३ ले विजयी भयो ।
जितपछि चौथो स्थानको रियल मड्रिडको २३ खेलबाट ४५ अंक भएको छ र उ एक खेल बढी खेलेको तेस्रो स्थानको भ्यालेन्सिया भन्दा एक, दोस्रो स्थानको एथ्लेटिको मड्रिड भन्दा १० र शीर्ष स्थानको बार्सिलोना भन्दा १७ अंकले पछि रहेको छ । यो खेलमा दुवै तर्फबाट ८ गोल भने भने खेल अवधिमा रेफ्रीले ८ वटा पहेँलो कार्ड प्रयोग गरे ।
भर्खरै
लोकप्रिय
