काठमाडौं – राष्ट्रपति विद्यादेवी भण्डारीले राष्ट्रियसभा सदस्यमा तीनजनालाई मनोनित गरेकी छन् ।
मंगलबार बिहान बसेको मन्त्री परिषद बैठकले सिफारिस गरेका तीनजनालाई राष्ट्रपति भण्डारीले राष्ट्रियसभा सदस्यमा मनोनित गरेकी हुन् ।
केपी शर्मा ओली सरकारले यसअघिका प्रधानमन्त्री शेरबहादुर देउवाले जाँदाजाँदै गरेको निर्णय उल्ट्याउँदै राष्ट्रियसभा सदस्यका लागि नयाँ तीनजनाको नाम सिफारिस गरेको थियो ।
मन्त्री परिषद बैठकले राष्ट्रियसभा सदस्याका लागि रामनाथ बिडारी, युवराज खतिवडा र विमला पौडेल राईको नाम सिफारिस गरेको थियो । राष्ट्रपति भण्डारीले सरकारले सिफारिस गरेका तीनैजनालाई राष्ट्रियसभा सदस्यमा मनोनित गरेकी हुन् ।
संविधान अनुसार ५९ सदस्यीय राष्ट्रियसभामा ५६ जना निर्वाचनबाट चुनिएका छन् । तीनजना भने प्रधानमन्त्रीको सिफारिसमा राष्ट्रिपतिले अनुमोदन गर्ने व्यवस्था रहेको छ ।
राष्ट्रपति भण्डारीले तीनजनालाई संविधानको धारा ८६ को उपधारा २ को खण्ड ख बमोजिम राष्ट्रियसभा सदस्यमा मनोनित गरेको राष्ट्रपति कार्यालय शीतल निवासले जनाएको छ ।
यसअघि देउवा सरकारले चाँदनी जोशी, गोपाल बस्नेत र कृष्णप्रसाद पौडेलको नाम सिफारिस गरेको थियो । ओली सरकारले निर्णय उल्ट्याउँदै नयाँ नाम सिफारिस गरेकोमा कांग्रेसले आपत्ति जनाएको छ ।
भर्खरै
लोकप्रिय
