लमजुङ – जलविद्युतका लागि लगानीमैत्री घोषणा गरिए पनि लमजुङका विभिन्न आयोजनाकाविरुद्ध स्थानिय बासिन्दा आन्दोलित भएका छन् ।
जिल्लामा निर्माण सम्पन्न र निर्माणाधिन जलविद्युत आयोजना नियमविपरीत सञ्चालन भएको भन्दै स्थानीयवासीले आन्दोलनका कार्यक्रम घोषणा गरेका हुन् ।
उदिपुर–भुलभुले राष्ट्रिय प्रशारण लाइन प्रभावितहरूले सुरु गरेको आन्दोलन विस्तारित भई जिल्लामा निर्माणाधिन सवै आयोजना केन्द्रित भएको हो । स्वतन्त्र अग्रिम जानकारीसहितको मञ्जुरी तथा अधिकार मञ्च लमजुङले शनिबार पत्रकार सम्मेलन गरी मागसहित संघर्षका कार्यक्रम सार्वजनिक गरेको हो ।
जलविद्युत आयोजनाहरूले प्रष्टरूपमा सार्वजनिक सुनुवाई नगरेको, सरकारका प्रचलित नियम कानुन र अन्तर्राष्ट्रिय सन्धि तथा महासन्धिविपरीत सञ्चालन गर्दा स्थानीय जनताको अधिकार लुटिएको भन्दै आन्दोलन गर्न बाध्य भएको मञ्चका संयोजक खेमजङ गुरुङले बताए ।
जिल्लाका जलसम्पदामा चरम भू तथा जल माफियाहरूको विगविगी बढेको मञ्चको दाबी छ । मञ्चले विभिन्न २४ बुँदे माग तथा संघर्षका कार्यक्रमसम्बन्धी जिल्लाका सवै सरोकारवाला निकायमा ज्ञापनपत्रमार्फत जानकारी गराएको छ ।
ज्ञापनपत्रमा जलविद्युत आयोजना सुरु गर्नुपूर्व वातावरणीय प्रभाव मूल्याङ्कन तथा सार्वजनिक गर्नुपर्ने, नागरिकको नोक्सान भएको सम्पत्तिको उचित मुआव्जा दिनुपर्ने, स्थानीय बासिन्दालाई रोजगार दिनुपर्ने, प्रभावितहरूलाई निःशुल्क शेयर प्रदान गर्नुपर्ने लगायतका माग राखिएको छ ।
यसअघि भुलभुले–मस्र्याङदी १३२ केभी प्रशारण लाइन प्रभावितहरूको माग सम्बोधन नभए २२० केभी प्रशारण लाइन निर्माण हुन नदिने चेतावनी दिइसकेका छन् । समितिले विभिन्न प्रकृतिको विरोध जुलुससहित आयोजना निर्माण बन्द गर्ने सम्मका विरोध कार्यक्रम सार्वजनिक गरेको छ ।
भर्खरै
लोकप्रिय
