काठमाडौँ- नेपाल संघीयतामा प्रवेश गरेपछिको विविधतापूर्ण संसद आइतबार आयोजित संघीय संसदको पहिलो बैठकको शपथ ग्रहण समारोहमा प्रस्टै देखिएको छ। परम्परागत भेषभूषा र पहिरनमा सजिएर आएका प्रतिनिधिसभा र राष्ट्रियसभाका सदस्यहरुले आआफ्नै मातृभाषामा पद तथा गोपनियताको शपथ लिएका थिए।
त्यहाँ साँच्चै नेपाल सयौँ थरि फूलको बगैचा जस्तो हो भन्ने आभास हुन्थ्यो जोकोहीलाई पनि। अरु दिनमा साधारण पोशाकमा देखिंदै आएका अधिकांश सांसदहरु आइतबार भने आफ्ना मौलिक पोशाकमा आउँदा सबैले एकअर्कालाई चिन्न गाह्रो परिरहेको थियो।
प्रतिनिधिसभा तथा राष्ट्रियसभा सदस्यहरु संसद भवन अगाडि कोही आपसमा बधाई आदान प्रदान गरिरहेका देखिन्थे भने कोही सेल्फी खिच्न व्यस्त देखिन्थे।
नेपाली पोशाक दौरा सुरुवाल लगाउने पनि भेटिएका थिए भने थारु, मगर, गुरुङ, मारवाडी, मुसलवान समुदायको वेशभूषामा सजिएका सांसद्ले राष्ट्रिय तथा स्थानीय समस्या समाधान गर्न र संविधान कार्यान्वयनमा पूर्णरुपमा प्रतिबद्ध भएर लाग्ने प्रतिबद्धतासमेत जनाएका थिए।
थारु वेशभूषामा शपथ ग्रहण समारोहमा उपस्थित भएकी सांसद शान्ता चौधरीसँग सेल्फी खिच्नेदेखि बधाई साटासाट गर्नेको राम्रै भीड लागेको थियो। उनले जनताले विश्वास र भरोसा व्यक्त गरेर आफूलाई प्रतिनिधिसभा सदस्यमा जिताएको स्मरण गरिन्।
उनले भनिन्, ‘प्रतिनिधिसभा सदस्यमा शपथ लिएपछि एक प्रकारको उत्साह र एक प्रकारको चिन्ता पनि लागेको छ। जनताले दिएको ज्म्मिेवारी पूरा गर्छौँ।’
पाँच पटकका अर्थमन्त्री डा रामशरण महतलाई पराजित गरेर प्रतिनिधिसभा सदस्यमा निर्वाचित नुवाकोट क्षेत्र नं १ बाट निर्वाचित हितबहादुर तामाङ आफ्नै समुदायको वेशभूषामा शपथ लिन संघीय संसद् भवन नयाँ बानेश्वर पगेका थिए।
तस्बिरहरु-वर्षा शाह/देश सञ्चार
भर्खरै
लोकप्रिय
