विराटनगर – विराटनगरमा गएको बिहीबार मञ्चन समापन भएको नाटक मुनामदन बंगलादेशमा पनि मञ्चन हुनेभएको छ । सार्क कल्चरल सोसाइटीको अग्रसरतामा मुनामदनलाई बंगलादेश लाने योजना बनाइएको छ ।
यसका लागि पूर्वाधार तयार गर्न सोसाइटीका नेपाल च्याप्टर अध्यक्ष राजेन्द्र गुरागाईं चैतको दोश्रो साता बंगलादेश जाने भएका छन् । यसैबीच दर्शकबाट अत्याधिक रुचाइएको महाकवि लक्ष्मीप्रसाद देवकोटाको कृतिमा आधारित ‘मुनामदन’ नाटक सोमबार तीनवटा अतिरिक्त शो मञ्चन हुने भएको छ ।
विराटनगरस्थित आरोहरण गुरुकुलको सुशीला कोइराला नाटक घरमा बिहान सवा १०, पैने १२ र साढे १ बजे तीनवटा शो मञ्चन हुन लागेको हो । दर्शकबाट अधिक रुचाइएपछि अतिरिक्त शो मञ्चन गर्न लागिएको नाटक आयोजनाका प्रमुख सल्लाहकार मीनकुमार नवोदितले जानकारी दिए । नाटकको औपचारिक समापन भने गएको बिहीबार नै भइसकेको छ ।
तर दर्शकबाट अधिक रुचाइएपछि पुनः अतिरिक्त शो देखाउन लागिएको हो । नाटकले सफलता प्राप्त गरिसकेकाले आगामी भदौमा पनि मुनामदन पुनः मञ्चन गरिने नाट्य संयोजक कमल पोखरेलले जनाए । मुनामदनको नाट्य रुपान्तरण तथा संवाद लेखन युवा साहित्यकार कट्वाल दीपकले गरेका हुन् ।
सुदीप कार्कीले निर्देशन गरेको नाटकमा लकेश दंगाल, सरु कटुवाल, मनाहाङ लावती, अनु श्रेष्ठ, प्रविण राई, जिना राई, निशान मगर, सविना भट्टराई, सन्जित राई, विकेक आचार्य र लकेश राईलगायतका कलाकारले अभिनय गरेका छन् ।
भर्खरै
लोकप्रिय
