मोहम्मद शमीलाई १० वर्षको जेल सजाय हुन सक्छ

भारतीय क्रिकेट टिमका तीव्र गतिका बलर मोहम्मद शमी विरुद्ध घरेलु हिंसा सम्बन्धी आरोप दर्ता भएको छ ।

शमीकी श्रीमती हसीन जहांले आफूमाथि हिंसा गरेको तथा ज्यान मार्ने धम्की दिएको भन्दै प्रहरीमा उजुरी दिएपछि त्यसकै आधारमा आरोप दर्ता भएको कोलकाता प्रहरीले जनाएको छ ।

२७ वर्षे शमीमाथि हत्याको प्रयास तथा ज्यान मार्ने धम्की दिएको भन्दै कानुनी आधारमा मुद्दा दायर गरिएको प्रहरीले उल्लेख गरेको छ ।

भारतीय क्रिकेट बोर्ड बिसिसिआईले बिहीबार जारी गरेको राष्ट्रिय टिममा अनुबन्धित खेलाडीको सूचिमा शमीको नाम समावेश छैन ।

शमीले श्रीमतीले आफूमाथि लगाएको आरोप झुट रहेको बताउँदै आएका छन् ।

शमी सन् २०१२ यत सबै प्रकारका प्रतियोगितामा गरी भारतको राष्ट्रिय टिमबाट ८७ खेल खेलिसकेका छन् ।

शमीमाथि कानुनको जुन धारा अनुसार आरोप दर्ता भएको छ, त्यो प्रमाणित भएमा उनीमाथि १० वर्ष वा त्यसभन्दा बढीको जेल सजाय हुन सक्छ ।

आरोप के के छ ?

शमीकी श्रीमती हसीन जहांले यो हप्ताको सुरुमा शमीको परस्त्रीसँग सम्बन्ध रहेको तथा आफूमाथि घरेलु हिंसा गरेको आरोप लगाएकी थिइन् ।
शमी र जहांको चार वर्षअघि विवाह भएको थियो ।

जहांले गएको मंगलबार शमीले चार वर्षको अवधिमा विभिन्न महिलालाई पढाएका सन्देशहरु फेसबुकमा राखेकी थिइन् ।

शमीका धेरै प्रेमिका रहेको र उनले आफूमाथि शारीरिक तथा मानिसक रुपमा लगातार शोषण गर्दै आएको जहांको आरोप छ ।

शमीले भने आफूमाथि लागेका सबै आरोपको खण्डन गर्दै यो ठूलो षडयन्त्रको पाटो रहेको दाबी गरेका छन् । आफूलाई बद्नाम गर्नका लागि यो आरोप लगाइएको शमीको भनाई छ ।

जहांले शमीका दाइले आफ्नो बलात्कारको प्रयास गरेको पनि आरोप लगाएकी छन् । बिसिसिआईको अनुगमन समितिले शमीमाथि लागेका आरोपले आफूलाई अप्ठ्यारो अवस्थामा पुर्‍याएको बताएको छ ।