काठमाडौं – नेकपा एमालेले गणेश तिमिल्सिनालाई राष्ट्रियसभा अध्यक्षको उम्मेदवार बनाउने भएको छ । प्रधानमन्त्री निवास बालुवाटारमा सोमबार बिहानैदेखि भएको छलफलले तिमिल्सिनालाई राष्ट्रियसभाको अध्यक्षका लागि उम्मेदवार बनाउने निर्णय गरेको हो ।
राष्ट्रियसभाको अध्यक्षका लागि सोमबार मनोनयन दर्ता हुँदैछ । बिहान १० बजेदेखि दिउँसो १ बजेसम्मका लागि मनोनयन दर्ताको समय रहेको छ । ५९ सदस्यीय राष्ट्रियसभाको अध्यक्षका लागि नेकपा एमालेमा पर्शुराममेघी गरुङ र गणेश तिमिल्सिना मध्ये एकलाई उम्मेदवार बनाउने चर्चा थियो ।
बिहानैदेखि प्रधानमन्त्री तथा एमाले अध्यक्ष केपी शर्मा ओली कसलाई उम्मेदवार बनाउने भन्ने बारेमा परामर्शमा थिए । लामो छलफलपछि तिमिल्सिनालाई उम्मेदवार बनाउने एमालेले निर्णय गरेको हो ।
वाम गठबन्धनमा राष्ट्रियसभाको अध्यक्ष एमालेको भागमा परेको छ । यसले गर्दा तिमिल्सिना अध्यक्ष बन्ने पक्का छ ।
यस्तै कांग्रेसले पनि आफ्ना उम्मेदवार खडा गर्ने नगर्ने बारे निर्णय गरेको छैन । राष्ट्रियसभामा एमालेका २९, कांग्रेस र माओवादीका समान १३ तथा संघीय समाजवादी फोरम र राष्ट्रिय जनता पार्टीका दुई दुई गरी ५९ सदस्य रहेका छन् ।
भर्खरै
लोकप्रिय
