काठमाडौं-मयुर यातायातलाई दिइएको कोटेश्वर पुर्वको रुट परमिट खारेजीको माग गर्दै ११ यातायात सम्बद्ध समितिले कोटेश्वरपुर्वमा गाडी नचलाएपछि सरकारले धुलिखेलसम्म यातायात कम्पनीलाई रुट परमिट दिने भएको छ।
अत्यावश्यक सार्वजनिक सेवामा अवरोध पर्याएपछि सरकारले नयाँ व्यवसायीलाई रुट परमिट दिने घोषणा गरेको हो। बनेपा सम्मको रुट परमिट लिएको मयुर यातायातले बुधबार देखि धुलिखेल सम्मै सेवा सुरु गरेको छ। मयुर यातायातका उपाध्यक्ष चन्द्रलाल तामाङले धुलिखेल सम्मको रुट परमिट लिएको जानकारी दिए।
काभ्रे प्रहरी प्रमुख सहकुल थापाका अनुसार बुधबार बनेपा र धुलिखेलसम्म मयुर यातायात बाहेक पनि महानगर, साझा, ओरेन्ज लगायतले सेवा सुरु गरेका छन्। ११ यातायात व्यवस्था समितिले सिन्डिकेट हुनु पर्ने भन्दै मयुरको परमिट खारेज गर्न माग गरिरहँदा सरकार भने सिन्डिकेट बिरुद्ध कडा रुपमा प्रस्तुत भएको हो।
यातायात व्यवस्था विभाग श्रोतले भन्यो, ‘हामी चाहन्छौं ११ यातायात व्यवस्था समितिमा आबद्ध व्यवसायीको रुट परमिट खारेज गर्नु नपरोस्।’ ‘विभागले केही दिन हेर्छ, उहाँहरुले गाडी चलाउनु भएन भने अत्यावश्यक सार्वजनिक सेवामा अवरोध गरेको कसुरमा कानुन बमोजिम रुट परमिट खारेज गर्नेछ।’
प्रहरी र प्रशासनका साथैं स्थानीय जनताको राम्रो साथ मिलेकाले गाडी चलाउन सहज भएको मयुर यातायातका तामाङको भनाई रहेको छ।
भर्खरै
लोकप्रिय
