भौतिक पूर्वाधार तथा यातायात मन्त्री रघुवीरप्रसाद महासेठले करिब तीन दशकयता यातायात क्षेत्रमा मौलाएको र फस्टाएको सिन्डिकेट प्रथा अन्त्य भएको बताएका छन्। सरकार र यातायात व्यवसायीबीच भएको पाँचबुँदे सहमति सार्वजनिक गर्दै मन्त्री महासेठले आफूले सबै क्षेत्रको सिन्डिकेट हटाउन पहल गर्ने पनि बताए।
मन्त्री महासेठले सोमबार मन्त्रालयमा पत्रकार सम्मेलन गर्दै यातायात व्यवसायी र सरकारको नङमासुको सम्बन्ध भएको उल्लेख गर्दै यातायात क्षेत्रलाई व्यवस्थित गर्न सिन्डिकेट हटाइएको जिकिर गरे।
‘बिगतमा पनि प्रयास भएको थियो। व्यवसायी साथीको सहयोगमा अहिले सिन्डिकेट हटाउन सकिएको हो,’ उनले मन्त्रालयमा भने।
मन्त्री महासेठले आन्तरिक व्यवस्थापन गर्न नसक्दा आन्दोलन घोषणा गरिएको उल्लेख गर्दै आन्दोलनलाई कतैबाट सहयोग नपुगेको उल्लेख गरे। ‘कतैबाट सहयोग मिलेन। आन्दोलनलाई हामीहरु र यातायात व्यवसायी सबैले आफ्नो आफ्नो तवरले ब्याख्या भयो। मिडियाले सहयोग नगरेको भए सिन्डिकेट समाप्त हुने थिएन,’ मन्त्री महासेठले भने, ‘यातायात क्षेत्रलाई मर्यादित र व्यवस्थित र व्यवसायीको लगानी सुरक्षित गर्न हामी प्रतिबद्ध छौं। यातायात व्यवसायीको सहयोग नभएको भए सिन्डिकेट हटाउन सकिने थिएन।’
उनले अर्थ मन्त्रालय, गृह मन्त्रालय, नेपाल राष्ट्र बैंक लगायतले सहयोग नगरेको भए सिन्डिकेट हटाउन सम्भव नभएको पनि बताए। मन्त्री महासेठका अनुसार आइतबार राति१० बजे सम्पुर्ण यातायात व्यवसायीहरुको सहमतिमा सम्झौता भएको र त्यस सम्झौताले यातायात क्षेत्रको सिन्डिकेटलाई समाप्त पारेको बताए।
‘व्यवसायी र हामी मिलेर यातायात क्षेत्रलाई व्यवस्थित गर्न लागेका छौं। अब यो देशमा यातायात क्षेत्रको सिन्डिकेट रहने छैन। हामीभित्र भएको लाइसेन्स, बिलबुक लगायतमा भएका कमजोरी हटाउने छौं,’ मन्त्रीले भने।
व्यवसायी र सरकारबीच भएका पाँचबुँदे सहमति पनि उक्त अवसरमा सार्वजनिक गरिएको छ।
सहमतिमा लेखिएको छ:
१. व्यवसायीले सरकारले सिन्डिकेटबिरुद्ध गरेको कदमको स्वागत गर्ने।
२. सर्वोच्च अदालतको आदेश अनुसार जाँचबुझ आयोग गठन गर्ने।
३. यातायात क्षेत्र रहेका सम्पूर्ण सिन्डिकेट हटाउने
४. आन्दोलन स्थगित गर्ने।
५. मन्त्रालयलाई सुझाव दिन एक कार्यदल गठन गर्ने।
तर, यातायात व्यवसायीहरुले भने सरकारले सम्झौताअनुसार सहमति नगरेको भन्दै आपत्ति प्रकट गरेका छन्। राष्ट्रिय यातायात व्यवसायी महासंघका अध्यक्ष योगेन्द्र कर्माचार्यले आफूहरु सिन्डिकेटको बिरोधी भएको उल्लेख गर्दै यातायात मन्त्रालयले नै सिन्डिकेट हटाउन नचाहेको बताए। उनले भने, ‘हामीले सहमति स्वीकार गरेका छौँ, यदि सिन्डिकेट सबै तिरको अन्त्य हुन्छ भने।’
भर्खरै
लोकप्रिय
