काठमाडौं- झट्ट हेर्दा दुवै खुट्टा छैन। तर मुख उज्यालो, हँसिलो छ उनको। मानौ संसारै जितेर आएजस्तो।
त्रिभुवन अन्तर्राष्ट्रिय विमानस्थलमा उनी भेट्टिँदा दुवै हात हल्लाइरहेका थिए, उनलाई भेट्न आउने आफन्त र फोटो खिच्न आउने पत्रकारहरुलाई।
हिउँले खाएको उनको गालामा घाउ र मुखमा मुस्कान प्रस्टैसँग देखिन्थ्यो। झट्ट हेर्दा शेर्पा जस्तो देखिए पनि उनी चिनियाँ नागरिक हुन्। उनको नाम हो एम्प्युटी सियाब्यूयो। उमेरले उनी ४० वर्ष पुगे।
शरीर अपाङग भए पनि मनमा अदम्य साहस र अठोट लिएर अघि बढ्ने गर्छन्। दुवै खुट्टा नभएका सियाब्यूयोले यही वैशाख महिनामा विश्वको सर्वोच्च शिखर सगरमाथाको सफलतापूर्वक आरोहण गरेका छन्।
सगरमाथाको आरोहण गरिसकेर उनी बुधबार काठमाडौं फर्किएका छन्। काठमाडौं फर्किए लगत्तै उनी काठमाडौं लाजिम्पाटमा रहेको स्वेविक अस्पतालमा घाउको उपचार गराउन गए।
गालामा भएको घाउको उपचार गराइसकेपछि उनी हाल लाजिम्पाटकै रोयल सिंगी होटलमा आराम गरिरहेका छन्। उनको लक्ष्य अझै विश्वका अग्ला हिमालहरुको सफलता पूर्वक आरोहण गर्ने हो। उनी भन्छन्, ‘ जीवन संघर्ष हो। यसलाई तपाई यसरी बाँच्नुस जसले संसारलाई नयाँ काम गर्ने प्रेरणा मिलोस।’
भर्खरै
लोकप्रिय
