काठमाडौँ – गीतकार तथा लघुकथाकार सुवासचन्द्र ढुङ्गेलको एकल मुक्तकवाचन तथा सांगीतिक कार्यक्रम भएको छ । सांस्कृतिक संस्थान तथा डिएमपिएस पूर्व विद्यार्थी समाजको आयोजानामा शुक्रबार जमलमा रहेको नाचघरमा भएको कार्यक्रममा ढुंगेलले आफ्ना ३५ वटा मुक्त वाचन गरे ।
यस्तै उनका गीतहरु गाइएका थिए । ढुंगेलले मुलुकमा असल नेता नजन्मिएको, देवता र राक्षस गुण भएका छुट्याउन गाह्रो भएको, कालो धनको प्रयोग गर्न पुरस्कारहरु स्थापना गरिएको, युवाहरु विदेशमा रोजगारका लागि बाध्य भएर जानुपरेको जस्ता विषय आफ्ना मुक्तकमा समेटेका थिए ।
प्रमुख अतिथि संस्कृतिकर्मी चेतन कार्कीले ढुङ्गेलका मुक्तकमा कतैकतै अनुप्रास नमिले जस्तो लागे पनि भावना र संवेगका दृष्टिले सशक्त रहेको बताए । संस्थानका महाप्रबन्धक राजेश थापाले संस्थाले हरेक महिनाको पहिलो बिहीबार सङ्गीत, दोस्रो बिहीबार काव्य र चौथो बिहीबार गायन कार्यक्रम आयोजना गर्ने गरेको जानकारी दिए ।
साहित्यकार प्रकाश सायमीले ढुङ्गेल ३० को दशकमा उदाएका गीतकार भएको बताए । कार्यक्रममा ढुङ्गेलद्वारा लिखित ‘मेरा यी हातहरुमा तरबार र छुरा नहोस्’, मनविना बाँच्न पाए हुन्थ्यो दुईचार वर्ष, ‘जति पीडा’, ‘चोट के हो’, ‘उसको नजरमा’, ‘जति चोट दिन्छौ’ बोलका गीत मेनुका पौडेल, अधिश्री कसपाल र दिवाकर शर्माले गाएका थिए ।
भर्खरै
लोकप्रिय
