महोत्तरी – महोत्तरीको गौशालामा अध्याधिक गर्मीले गर्दा एकजनाको मृत्यु भएको छ । यस्तै अरु दुईजना बेहोस भएका छन् ।
गर्मीका कारण जिल्लाका गौशाला नगरपालिका—८ बेलगाछी घरभएकी अन्दाजी ३५ वर्षकी शिकिल देवी सादा मुसहरको मृत्यु भएको इलाका प्रहरी कार्यालय गौशालाका प्रहरी निरीक्षक भोला भट्टले जनाएका छन् ।
यस्तै, ५५ वर्षकी सुनर देवी सादा मुसहर र २५ वर्षकी किसुन देवी सादा मुसहर बेहोस् भएर अस्पताल भर्ना भएका छन् । सुनर देवी मृतककी सासु हुन् भने किसुन देवी छिमेकी हुन् ।
आइतबार बिहानै गरिब परिवारकी सुनर देवी महिलाको समूहमा धान रोप्न गाउँकै उमेश महतोको खेतमा पुगेका थिए । धान रोप्ने क्रममा गर्मीले गर्दा सुनर देवी र छिमेकी किसुन देवी बेहोस भएपछि उक्त खबर पुर्याउन चर्को घाममै दगुरेर शिकिल देवी घर गएको र घरबाट फेरि खेत तिर फर्कन लागेको बेला उनी बाटोमै बेहोस भएकी थिइन् । पछि उनको मृत्यु भएको हो ।
मृतकको शवको पोष्टमार्टमका लागि जिल्ला अस्पताल जलेश्वरमा राखिएको छ । यता, बेहोस भएका दुवैजनाको गौशाला स्थित प्राथमिक स्वास्थ्य उपचार केन्द्रमा उपचार भइरहेको र उनीहरुको स्वास्थ्य अवस्था सुधारउन्मुख रहेको उपचारमा संलग्न रहेको डाक्टर मनोज दासले जनाएका छन् ।
पाँच जना सन्तानकी आमा शिकिलको कान्छो छोरा मात्र ६ महिनाको छ । उनका श्रीमान रघुनाथ सादा रोजगारीको लागि शनिवार मात्रै भारतको पञ्जाव गएका छन् ।
भर्खरै
लोकप्रिय
