अहिलेको वर्षे पानीमा राजस्थानको बालुवा र धुलो

काठमाडौँ – देशका प्रायः सबै क्षेत्रको मौसम शनिबार बलदी हुने जल तथा मौसम पूर्वानुमान महाशाखाले जनाएको छ । विशेषगरी पूर्वको पहाडी क्षेत्रमा पूर्ण बदली भइ पानी पर्ने सम्भावना रहेको मौसमविद सुवास रिमालले जानकारी दिए ।

यस्तै पूर्वी तराईका केही क्षेत्रमा मौसम खुलेको जस्तो देखिए पनि अरु प्रायः सबै क्षेत्रको मौसम बलदी हुने तथा पानी पर्ने सम्भावना पनि रहेको उनले जानकारी दिए ।

यस्तै काठमाडौँ उपत्यकासहितका मध्य तथा पश्चिम क्षेत्रमा पनि आंशिकदेखि पूर्ण बदली हुने सम्भावना रहेको मौसमविद रिमालले बताए । तर पश्चिम तराईका क्षेत्रमा भने कम पानी पर्ने सम्भावना छ ।

मनसुनी वायु पूर्वमै रहेको र निकै कमजोर अवस्थामा रहेकाले देशभर पूर्ण बदली र पानी पर्ने सम्भावना भने छैन ।

राजस्थानको बालुवा र धुलो नेपालमा

पछिल्लो केही समयदेखि भारतको उत्तर प्रदेश तथा दिल्लीमा बालुवा तथा धुलोसहितको आँधीले दुःख दिएको छ । त्यसको प्रभाव नेपालमा पनि देखिएको हुन सक्ने मौसमविदले बताएका छन् ।

शुक्रबार काठमाडौँ उपत्यका तथा पूर्वमा गरेको पानीमा सेतो धुलोको कण देखिएको र यो राजस्थानबाट आएको हलुका बालुवा तथा धुलोको कण रहेको हुन सक्ने मौसमविद रिमालले बताए ।

नेपालको उच्च वायुमण्डलमा राजस्थानसहितका पश्चिमको क्षेत्रबाट आएको वायु रहेकाले त्यहाँको बालुवाको कण र धुले आँधीको प्रभाव परेको हुन सक्ने आँकलन गरिएको रिमालले बताए ।

तर यो के हो भन्ने जाँच गर्ने प्रविधि नेपालमा नरहेको र यस्तो प्रकारको धुलोको कण अनुभव नै गर्न सकिने खालको वर्षा नेपालमा पहिलो पटक भएकाले पनि आफूहरु आँकलन गर्ने अवस्थामा मात्रै रहेको मौसमविद रिमालले बताए ।

राजस्थानसहितका क्षेत्र धेरै पर रहेकाले नेपालमा पानीमा मिसिएर बालुवा तथा धुलोको मात्रा कम पर्ने उनले बताए । तर वर्षाको पानी प्रयोग भने नर्गन उनले सुझाव दिएका छन् । भारतको उत्तर प्रदेश तथा दिल्लीको जस्तो अवस्था नेपालमा नहुने पनि उनले बताएका छन् ।