देशभर फैलियो मनसुन

काठमाडौँ – मनसुन देशभर फैलिएको छ । भित्रिएको झण्डै तीन हप्तापछि मनसुन बुधबार दिउँसोदेखि देशभर फैलिएको जल तथा मौसम पूर्वानुमान महाशाखाले जनाएको छ ।

देशभर नै मनसुनी वायु सक्रिय रहेको र बादल फैलिएको मौसमविद विभुति पोख्रेलले जानकारी दिइन् । अबको तीन दिनसम्म देशका धेरै स्थानमा सामान्यदेखि मध्यम स्तरको वर्षा हुने सम्भावना रहेको छ ।

अहिले मनसुनको प्रभाव पूर्व र पश्चिममा अलि बढी देखिएको छ । यसले गर्दा बिहीबार पूर्व र पश्चिमको मौसम सामान्यतया बदली हुने र केही स्थानमा पानी पर्ने सम्भावना छ ।

यस्तै काठमाडौँ उपत्यकासहित मध्य क्षेत्रमा भने आंशिक बदली हुने र थोरै स्थानमा पानी पर्ने सम्भावना रहेको मौसमविद पोख्रेलले जानकारी दिइन् । तर बेलुका तिर मध्य क्षेत्रको मौसम पनि सामान्यतया बदली हुने जस्तो देखिएको छ ।