धादिङ – लगातारको वर्षासँगै पहिरो जाँदा धादिङमा पाँचजनाको ज्यान गएको पुष्टि भएको छ ।
खनियाबास गाउँपालिका–५ सईसरामा बुधबार मध्य रातमा पहिरो जाँदा स्थानीय राजबहादुर गुरुङ्गको परिवारका तीनजनाको ज्यान गएको जिल्ला प्रहरी कार्यालय धादिङका सूचना अधिकृत डिएसपी रामबहादुर केसीले जानकारी दिए ।
ज्यान गुमाउनेमा राजबहादुरकी ३३ वर्षकी श्रीमती बसुता तथा १० वर्षकी छोरी लक्ष्मी र ५ वर्षकी छोरी सरस्वतीको रहेको डिएसपी केसीले जानकारी दिए । राजबहादुर भने बाँच्न सफल भएका छन् ।
यस्तै मध्य रातमै खनियाबास–४ चिउरीबोटमा पहिरो जाँदा पुरिएर दुईजनाको ज्यान गएको छ । पुरिएका ६५ वर्षका शमशेर घले र उनकी श्रीमती ६२ वर्षकी कोप्ची घलेको शव निकालिएको डिएसपी केसीले जनाकारी दिए ।
बाटोमा ठाउँठाउँमा पहिरो गएकाले आफूहरु पुग्न समय लागेको प्रहरीले बताएको छ । अहिले उद्धार तथा खोजीको काम भइरहेको छ ।
भर्खरै
लोकप्रिय
