नेपालगञ्ज – लगातार परेको पानीका कारण नेपालगञ्जका अधिकांश क्षेत्र जलमग्न भएका छन् । आइतबार रातिदेखि परेको पानीका कारण नेपालगञ्जको मुख्यबजार क्षेत्र डुबानमा परेको छ ।
सेतु बिक चोक, न्यूरोड, बसपार्क, घरबारीटोल, धम्बोझी, गणेशपुर, फूल्टेक्रा, बुलबुलिया, बेलासपुर जलमग्न भएका छन् ।
नेपालगञ्ज उपमहानगरपालिकाले राम्ररी नाली सफा गरेर निकास दिन नसकेपछि यो वर्ष अलि धेरैबेर परेको पानीले धेरै ठाउँ डुबानमा परेका छन्। नेपालगञ्जका यी बजार क्षेत्र भने वर्षेनी डुबानमा पर्ने गर्दछन् ।
मुख्य बजार क्षेत्र नै डुवानमा परेपछि नेपालगञ्जका मेयर र उपमेयरको सामाजिक सञ्जालमा कडा आलोचना गरिएको छ । ‘नेपालगञ्ज बजारमा आउनु परेमा डुंगा लिएर आउनु होला’ जस्ता शब्द लेखेर मेयर र उपमेयरमाथि व्यंग्य गरिएको छ ।
यता, नेपालगञ्ज उपमहानगरपालिकाले भने ढल निकास र नाली सफाईको काम तीव्र गतिमा गरिरहेको जनाएको छ ।
यसैबिच, आइतबार रातिदेखि परेको अबिरल वर्षाका कारण बैजनाथ गाउँपालिकाको जेठीनालामा दुई जना बेपत्ता भएका छन् । स्थानीय ६५ वर्षका तुलाबहादुर बुढा खोला तर्ने क्रममा बेपत्ता भएको प्रहरीले बताएको छ ।
त्यही खोलामा पौडी खेल्ने क्रममा लोकबहादुर सुनार बेपत्ता भएका छन् । दुवैको खोजी कार्य जारी रहेको प्रहरीले बताएको छ ।
भर्खरै
लोकप्रिय
