थाइल्याण्डको एक गुफामा फसेको दुई हप्तापछि उद्धार गरिएका चार बालकलाई परिवारका सदस्यले सोमबार बेलुका भेट्न पाउने भएका छन् ।
गुफामा फसेका १२ बालक र उनीहरुका फुटबल प्रशिक्षकको उद्धारका लागि ९० जनाको टोलीले आइतबारदेखि अभियान सुरु गरेको छ । पहिलो दिन चार बालकलाई उद्धार टोलीले गुफाबाट बाहिर निकालेको छ ।
उद्धार गरिएका बालकको अवस्था राम्रो रहेको अहिले स्वास्थ्य परीक्षण चलिरहेको स्वास्थ्य अधिकारीलाई उद्धृत गर्दै द गार्डियनले जनाएको छ ।
थाइल्याण्डको स्वास्थ्य विभागका डाक्टर थोङ्गचाइ लरट्वीलाईराट्टानापोङ्गका अनुसार चार बालकको अहिले विभिन्न परीक्षण भइरहेको छ । उनले थाइल्याण्डको पत्रिका कोम चाड लेकलाई चार बालकले सोमबार बेलुकासम्म आफ्नो परिवारका सदस्यलाई भेट्न पाउने जानकारी दिएका छन् ।
तर त्यसबेला शारीरिक रुपमा छुन वा अंकमाल गर्न भने दिइने छैन । रगत परीक्षणको रिपोर्ट नआएसम्म बालकलाई शारीरिक रुपमा छुन नदिइने उनले बताए ।
उनले भने, ‘परिवारका सदस्यलाई बालकहरुसँग कुरा गर्न मात्रै दिइने छ । अंगालो हाल्न वा छुन पाइने छैन । भेट्न जानेहरु एक वा दुई मिटर पर बस्नु पर्नेछ ।’
उद्धार गरिएका बालकमा गम्भीर खालको संक्रमण रहे नरहेको बारे स्पष्ट हुन डाक्टरले परीक्षण गरिरहेका छन् । उनीहरुमा लेप्टोस्पाइरोसिस वा मेलिओइडोसिससहितका संक्रमण रहे नरहेको बारे स्पष्ट हुन खोजिँदैछ ।
चिएङ्ग राईमन गभर्नर नारोङ्गसाक ओसोटानाकोर्नका अनुसार सोमबार बिहानदेखि फेरि अर्को चरणको उद्धार अभियान सुरु हुनेछ । गुफामा फसेकाहरुको उद्धारका लागि ९० जना खटिएका छन् ।
त्यसमा ५० जना विदेशी छन् भने ४० जना थाइल्याण्डका रहेका छन् । गएको जुन २३ मा फुटबलको प्रशिक्षण सकेर गुफामा गएका १२ बालक र उनीहरुका प्रशिक्षक त्यहिँ फसेका थिए ।
भर्खरै
लोकप्रिय
