थाइल्याण्डको उत्तरी क्षेत्रमा रहेको एक गुफामा फसेका बालक र उनीहरुका फुटबल प्रशिक्षकलाई उद्धार गर्ने अभियान मंगलबार फेरि सुरु भएको छ ।
गुफामा बाँकी रहेका चार बालक र उनीहरुका २५ वर्षे फुटबल प्रशिक्षकलाई उद्धार गर्ने अभियानका लागि उद्धारमा खटिएका १९ जना डाइभर स्थानीय समय अनुसार बिहान १० बजेपछि गुफामा पसेका छन् । आइतबारदेखि सुरु भएको उद्धार अभियानमा अहिलेसम्म ८ बालकलाई सुरक्षित रुपमा बाहिर निकालिएको छ ।
मंगलबार बाँकी रहेका चार बालक, उनीहरुका प्रशिक्षक तथा उनीहरुको हेरचाहका लागि रहेका डाक्टर र नौसेनलाई बाहिर ल्याउने तयारी छ । यो नै अन्तिम उद्धार अभियान हुने अपेक्षा गरिएको छ।
पहिलो दिन आइतबार ११ घण्टा लगाएर चार बालकलाई बाहिर निकालेका डाइभरले दोस्रो दिन सोमबार ९ घण्टा लगाएर थप चार बालकलाई उद्धार गरेका थिए ।
तस्बिर : राेयटर्स
अन्तिम चरणको उद्धार सोमबारको भन्दा पनि छोटो अवधिमा हुने अपेक्षा गरिएको सरकारी अधिकारीले बताएका छन् । सोमबार रातभर ठूलो वर्षा भएकाले गुफाको अवस्था चुनौतीपूर्ण नै रहेको छ ।
गुफाबाट बाहिर निकालिएका बालकहरुको स्थानीय अस्पतालमा उपचार भइरहेको छ र उनीहरुको स्वास्थ्य अवस्था राम्रो रहेको जानकारी सरकारी अधिकारीले दिएको बिबिसी र द गार्डियनले जनाएका छन् । गुफामा बाँकी रहेका बालक मध्ये सबै भन्दा कम उमेरका बालक ११ वर्षे रहेको जनाइएको छ ।
पहिलो दिन उद्धार गरिएका चार बालकले सिसाको झ्यालबाट आफ्ना अभिभावकलाई हेरेको स्वास्थ्य अधिकारीले बताएका छन् । उनीहरुले चाँडै नै अभिभावकसँग बोल्न पाउने छन् । यस्तै दोस्रो दिन सोमबार उद्धार गरिएका चार बालकले पनि चाँडै नै आफ्ना अभिभावकलाई देख्न पाउने छन् ।
अस्पतालमा रहेका दुई बालकको फोक्सोमा सामान्य खालको संक्रमण देखिएको छ । सबैलाई सनग्लासेस लगाउन दिइएको छ, किनकी उनीहरु दुई हप्ता भन्दा बढी समय पूर्ण अँध्यारोमा थिए ।
उनीहरुलाई अहिलेसम्म थाइ खाना, भात दिइएको छैन । बालकहरुले भने भात खाने इच्छा व्यक्त गरेका छन् । उनीहरुलाई केही चकलेट र हलुका खाना दिइएको स्वास्थ्य अधिकारीहरुले बताएका छन् ।
उद्धार गरिएका बालकलाई कम्तिमा सात दिन अस्पतालमै राखिने छ । यसको अर्थ उनीहरुले विश्वकप फुटबल हेर्न पाउने छैनन् । उनीहरुलाई विश्व फुटबलको प्रशासकीय निकाय फिफाका अध्यक्षले रुसमा जारी विश्वकप फुटबलको फाइनल हेर्नका लागि निम्तो गरेका थिए ।
गुफामा बाँकी रहेका चार बालक र उनीहरुका फुटबल प्रशिक्षकको स्वास्थ्य अवस्था राम्रो रहेको र उनीहरु उद्धारकर्मीसँगै डाइभ गरेर निस्कनका लागि तयार रहेको बताइएको छ । गुफामा बाढी पसेको तथा बाहिर निस्कने बाटो साँघुरो रहेकाले समस्या भएको छ ।
गएको जुन २३ मा फुटबलको प्रशिक्षण सकेर गुफामा गएका १२ बालक र उनीहरुका प्रशिक्षक त्यहिँ फसेका थिए । १२ बालक र उनीहरुका फुटबल प्रशिक्षक प्रशिक्षण सकेर गुफा हेर्न गएका थिए ।
चिएङ्ग राईमा रहेको थाम लुङ्ग गुफा गएका उनीहरु गुफामा बाढीको पानी पसेका कारण निस्कने बाटो बन्द हुँदा फसेका थिए । उद्धारकर्मीमा विश्वका उत्कृष्ट ‘केभ डाइभर्स’ छन् ।
भर्खरै
लोकप्रिय
