पूर्ण बदलीको सम्भावना कम, तर मौसम भने खुल्दैन

काठमाडौँ – देशभरको मौसम बुधबार दिनभर सामान्यतया बदली हुने तर पूर्ण बदलीको सम्भावना भने नरहेको जल तथा मौसम पूर्वानुमान महाशाखाले जनाएको छ ।

अहिले देशका धेरै ठाउँमा बदली भएको छ तर दिउँसो तिर मौसम केही खुल्ने सम्भावना रहेको मौसमविद गंगा नगरकोटीले बताइन् । केहीबेर मौसम खुलेजस्तो भए पनि मनसुनी गतिविधि सक्रिय रहेकाले फेरि बदली हुनेछ ।

देशभर नै हल्कादेखि मध्यम स्तरको पानी पर्ने सम्भावना छ । विशेष गरी पश्चिम र पूर्वी पहाडी क्षेत्रमा पानी पर्ने सम्भावना छ ।

यस्तै पूर्व र मध्य तराईका क्षेत्रमा भने पानी पर्ने सम्भावना कम रहेको र परे पनि हल्का मात्रै वर्षा हुनेछ । बेलुका तथा राति भने पूर्ण बदली हुने सम्भावना रहेको र पानी पनि पर्नेछ ।