टोपे खोलामा ठूलो पहिरो, नारायणगढ-मुग्लिन सडकखण्ड अवरुद्ध

चितवन – पहिरोका कारण नारायणगढ—मुग्लिन सडकखण्ड बिहीबार बिहानैदेखि अवरुद्ध भएको छ ।

बिहान ६ बजेतिर इच्छाकामना गाउँपालिका–६, टोपेखोलामा पहिरो खसेका कारण बाटो अवरुद्ध भएको सडक आयोजनाका सूचना अधिकारी शिव खनालले जानकारी दिए ।

ठूलो पहिरो खसेकाले बाटो दुई तर्फी रुपमा नै खुलाउन समय लाग्ने देखिएको छ । चाँडोमा दिउँसो १ बजेसम्ममा बाटो खुलाउन सकिने देखिएको खनालले बताए । तर एक तर्फी रुपमा बाटो खुलाउने प्रयास भने भइरहेको छ ।

पहिरो हटाएर बाटो खुलाउने प्रयास भइरहेकाले बिहानको समयमा वैकल्पिक बाटो प्रयोग गर्न पनि अनुरोध गरिएको छ ।