काठमाडौँ – राष्ट्रिय ध्वजावाहक नेपाल वायु सेवा निगमले दोस्रो वाइड बडी जहाज ल्याएको छ । ‘मकालु’ नाम राखिएको वाइड बडी बिहीबार बिहान ९ बजे त्रिभुवन अन्तर्राष्ट्रिय विमानस्थलमा अवतरण भएको हो ।
फ्रान्सबाट ८ घण्टाको उडान तय गरेर वाइड बडी विमान आइपुगेको हो । ‘नाइन एन एएलजेट’ कलसाइनको मकालु विमानमा १८ बिजनेस तथा २५६ साधारण गरी कुल २७४ सिट रहेको छ ।
नेपाल आइपुगेको एयर बसले तीन हप्ता भित्र उडान अनुमति पत्र, एओसी लिएर उडान सुरु गर्ने पर्यटन मन्त्रालयका सचिव कृष्ण देवकोटाले जानकारी दिए ।
निगमले केही हप्ता अघि यस्तै वाइड बडी एयरबस अन्नपूर्ण ल्याएको थियो । फ्रान्सको एयरबसबाट २५ अर्बको लागतमा दुई एयर बस ल्याएको हो ।
दुवै विमानले अन्तर्राष्ट्रिय प्रचलन अनुसार सुरुको दुई महिना पुरानै गन्तव्य र त्यसपछि जापान, कोरिया तथा साउदी अरेबियामा उडान भर्ने निगमका प्रमुख सुगतरत्न कंशाकारले बताए ।
निगमको पहिलो वाइड बडी ‘अन्नपूर्ण’ विमान गएको असार १४ गते त्रिभुवन अन्तर्राष्ट्रिय विमानस्थलमा अवतरण गरेको थियो । निगमको पहिलो वाइड बडी विमानले साउन १८ (अगष्ट १) देखि कतारको दोहामा व्यावसायिक उडान सुरु गर्ने तयारी छ ।
विमान उडाउनका लागि विदेशी पाइलट लिन उनीहरुको श्रम स्वीकृति अन्तिम चरणमा पुगेको निगमले जनाएको छ । तत्कालका लागि भने एयर बसकै पाइलटले उडाउने छन् ।
निगमसँग अब एयर बस ३३० दुई, एयर बस ३२० दुई तथा एउटा बोइङ्ग ७५७ रहेको छ । बोइङ्ग बेच्ने तयारी रहेको छ ।
यो पनि पढ्नुहोस्
भर्खरै
लोकप्रिय
