नारायणगढ– मुग्लिन सडकको घुमाउनेमा पहिरो, बाटो अवरुद्ध

चितवन – पहिरोका कारण नारायणगढ– मुग्लिन सडकखण्ड अवरुद्ध भएको छ ।

सडकखण्डको घुमाउने भन्ने ठाउँमा बिहीबार बिहान तीन बजेतिर पहिरो गएकाले बाटो अवरुद्ध भएको नारायणगढ– मुग्लिन सडक आयोजनाका सिनियर डिभिजनल इन्जिनियर गोविन्द खनालले जानकारी दिएका छन् ।

लगातार पानी परेको तथा पहिरो झर्ने क्रम नरोकिएकाले बिहान ६ बजेपछि मात्रै पहिरो हटाउने काम सुरु भएको उनले जानकारी दिए । अहिले पहिरो हटाएर बाटो खुलाउने प्रयास भइरहेको छ । चाँडै नै बाटो खुलाइने उनले बताए ।

निर्माणाधीन यो सडकखण्डमा पानी परेपछि प्राय पहिरो जाने गरेको छ । ट्राफिक प्रहरीले पहिरोका कारण बाटो अवरुद्ध भएकाले तत्कालका लागि वैकल्पिक मार्ग प्रयोग गर्न आग्रह पनि गरेको छ ।