मोरङ – प्रदेश नम्बर १ सरकारले प्रदेशभित्र रहेका विभिन्न नामका सामाजिक संस्थालाई कडाई गर्ने जनाएको छ । प्रदेश सरकारले प्रदेश भित्र अवस्थित करिब ५ हजार बढी संस्थाले साम्प्रदायिक द्धैष, धार्मिक विचलन, गोप्य सूचना विदेश पुर्याउने, समाजलाई द्वन्द्वको अवस्थामा पुर्याउने खालका गतिविधि गर्दै आएको उल्लेख गरेको छ ।
विराटनगरमा सोमबार बसेको संसद बैठकमा समाजिक विकास तथा योजना मन्त्री जीवन घिमिरेले उद्घोष गरेका हुन् । उनले बैठकमा राज्यविपरित कार्य गर्दै आएका संस्थाहरु बन्द गर्ने बताए । सामाजिक विकास संस्था सम्बन्धमा बनेको विधेयकमाथि सांसदले उठाएका प्रश्नको जवाफ दिँदै मन्त्री घिमिरेले सामाजिक कामको नाममा जासुसी गर्ने गरेको आरोप लगाए ।
त्यसैगरी विधेयकमाथिको सैद्धान्तिक छलफलका क्रममा प्रदेशसभा सदस्य मोहनकुमार खड्काले समाजिक संस्था गठन गरेर कमाइ खाने भाँडो बनाउने र समाजलाई खलल पुर्याउनेहरुलाई पनि विधेयकले रोक्ने प्रयास गरेको भन्दै प्रसंशा गरेका थिए ।
विधेयकमाथि सोमबारको सैद्धान्तिक छलफलमा ९ जना सांसदले आफ्नो धारणा राखेका छन् । यसअघि, आइतबारको बैठकमा ८ जनाले विधेयकमाथि आफ्ना धारणा राखेका थिए । १७ जना सांसदले आफ्ना धारणा राखेसँगै विधेयकमाथिको सैद्धान्तिक छलफल सकिएको छ ।
भर्खरै
लोकप्रिय
