पश्चिमका नदी आसपासका क्षेत्रका बाढीको जोखिम

काठमाडौँ – देशभरको मौसम बदली भइ धेरै ठाउँमा हल्कादेखि मध्य पानी परेकाले विभिन्न नदी तथा खोलमा बाढीको जोखिम देखिएको बाढी पूर्वानुमान महाशाखाले जनाएको छ ।

अहिले तराई तथा चुरे क्षेत्रमा बाक्लो बादलसहित पानी परेको छ । विशेष गरी पश्चिमका दाङ, बाँके, बर्दिया, कैलाली, कञ्चनपुरसहितका क्षेत्रमा पानी परेकाले बाढीको जोखिम रहेको महाशाखाले जनाएको छ ।

दिउँसोतिर बादल पहाडी क्षेत्रमा सर्ने र पानी पर्ने सम्भावना रहेकाले चुरे क्षेत्रबाट बग्ने साना खोला तथा खहरेमा बाढीको जोखिम छ ।

अबको केही दिन पानी पर्ने सम्भावना रहेकाले धेरै ठूला तथा मझौला नदीमा पानीको बहाब बढ्ने सम्भावना छ । यसले गर्दा नदी आसपासका बस्तीका बासिन्दाले सतर्कता अपनाउनु पर्ने विज्ञले बताएका छन् ।