सामाजिक सञ्जाल फेसबुकले प्रयोगकर्ताको विश्वसनीयता सम्बन्धी जानकारी दिने भएको छ । फेसबुकले प्रयोगकर्ताको ‘ट्रस्टवर्थीनेस स्कोर’ अर्थात विश्वसनीयता सम्बन्धी गणना दिने तयारी गरेको हो ।
अहिले केही प्रयोगकर्तामा यस सम्बन्धी प्रयोग भइरहेको फेसबुकले पुष्टि गरेको छ । पहिलो चरणमा फेसकुबले केही प्रयोगकर्तालाई उनीहरुको सामाजिक सञ्जाल एकाउन्टको विश्वसनीयता सम्बन्धी स्कोर दिन थालेको हो ।
अमेरिकी पत्रिका द वासिङ्गटन पोस्टका अनुसार फेसबुकले यस सम्बन्धी प्रणालीको विकास गएको एक वर्षदेखि गर्दै आएको थियो ।
फेसबुक मार्फत झुट वा प्रोपोगाण्डा मच्चाउने खालका समाचार फैलाउने क्रम बढेको र यसले गर्दा मानिसहरुमा समस्या उत्पन्न भएपछि आफूहरुले त्यसलाई नियन्त्रण गर्नका लागि नयाँ प्रणालीको विकास गरेको सामाजिक सञ्जालले जनाएको छ । तर प्रयोगकर्ताको विश्वसनीयता कसरी गणना गरिन्छ वा विश्वसनियता नाप्ने प्रणालीको सीमितताका बारेमा केही बताइएको छैन ।
प्रयोगकर्ताले आफ्नो विश्वसनीयता स्कोर पाउने स्पष्ट तरिका नरहेको भन्दै विशेषज्ञले फेसबुकको नयाँ प्रणालीको आलोचना गरेका छन् । तत्कालका लागि फेसबुकको मिसइन्फरमेसन टिमले मात्रै विश्वसनीयता सम्बन्धी गणना गर्न पाउने थाहा भएको बिबिसीले उल्लेख गरेको छ ।
फेसबुकले नयाँ टुललाई प्रतिष्ठा मापन वा रेटिङ्गका रुपमा परिभाषित गर्ने तयारी गरेको छ । द वासिङ्गटन पोस्टले फेसबुकले प्रयोगकर्ताको ‘रेपुटेसन रेटिङ्ग’ तय गर्ने टुलको विकास गरेको उल्लेख गरेको छ ।
तर फेसबुकका प्रवक्ताले भने आफूहरुले झुट समाचार फैलाउनेहरुलाई नियन्त्रण गर्न तथा विश्वसनीयता बढाउनका लागि नयाँ टुलको विकास गरेको बताएका छन् ।
गलत सूचना विरुद्धको आफूहरुको लडाईँ सकेसम्म प्रभावकारी होस् भन्नका लागि नयाँ प्रणालीको विकास गरिएको ती प्रवक्ताले भनेका छन् ।
द वासिङ्गटन पोस्टले ‘फेक न्युज’ विरुद्धको अभियानबारे फेसबुककी कार्यकारी टिसा लियोन्ससँग गरेको कुराकानीमा आधारित भएर खबर छापेको हो । फेसबुकले सन् २०१६ मै तथ्य जाँच गर्ने योजना सुरु गरेको टिसाले बताएकी छन् ।
झुट खबर फैलिएको सम्बन्धी उजुरी र त्यसमाथि स्वतन्त्र तथ्य–जाँचकर्ताले गर्ने अनुसन्धानपछि विश्वसनीयताको गणना गरिने बुझिएको छ । रेटिङ्ग ० देखि १ सम्म हुनेछ।
भर्खरै
लोकप्रिय
