जाडो बढ्दै, पश्चिममा बदली र पानी पर्ने सम्भावना

काठमाडौँ – काठमाडौँ उपत्यकासहित देशभर जाडो बढ्दै गएको छ । पश्चिमी वायुको प्रभावका कारण विशेष गरी सुदूरपश्चिम र पश्चिमका क्षेत्रको मौैसम सामान्यतया बदली भएको र यसले चिसो थप बढेको जल तथा मौसम पूर्वानुमान महाशाखाले जनाएको छ ।

पश्चिमका क्षेत्रको मौसम शनिबार दिनभरजसो बदली हुने र केही ठाउँमा पानी पर्ने सम्भावना रहेको मौसमविद विभूति पोखरेलले जानकारी दिइन् । यस्तै मध्य तथा पूर्वी क्षेत्रका केही ठाउँमा पनि आंशिकदेखि सामान्य बदली हुने सम्भावना छ ।

पूर्व र मध्यका पहाडी क्षेत्रमा दिउँसोपछि छिटफुट पानी पर्ने सम्भावना रहेको मौसमविदले बताए । काठमाडौँ उपत्यकामा पनि दिउँसो तिर बदली हुने सम्भावना रहेको छ ।