काठमाडौँ– बिजनेस टाइकुन एवं नेपालका एक मात्र अर्बपति विनोद चौधरीको मुख्य कार्यालयमा बुधबार अलग्गै रौनक थियो।
लक्ष्मीको पूजाका अवसरमा चौधरी ग्रुपको सानेपास्थित मुख्यालय चिटिक्क पारिएको थियो। अर्बपति चौधरी विदेशयात्राबाट नफर्केका भए पनि उनका तीन छोराहरुसहित परिवारका सदस्यले लक्ष्मीपूजा गरेका छन्।
विदेशमा रहेका विनोद चौधरी दिउँसो एक बजे आइपुग्ने तालिका भएपनि फ्लाइट ढिलाइ भएपछि उनी उपस्थित हुन नसकेको सिजी ग्रुपका कर्पोरेट महाप्रबन्धक मधुसुदन पौडेलले जानकारी दिए।
मुख्य कार्यालय सिजी ग्रुपमा उनका छोराहरु निर्वाण, राहुल र वरुणले लक्ष्मीको पूजा गरेका थिए। उनका कान्छा भाइ अरुण चौधरी र कार्यालयका उच्च तहका कर्मचारीहरु पनि सहभागी थिए।
साँझ ५ बजेदेखि सुरु भएको पूजा करिव डेढ घण्टा चलेको थियो। विनोद चौधरी नेपालका सर्वाधिक धनी र फोर्ब्सको सूचीमा समेटिएका नेपालका एक मात्र धनी व्यक्ति हुन्।
चौधरी विश्वकै धनी व्यक्तिको सूचीमा १५६१औँ सूचीमा छन्। सन् २०१८ मा फोर्ब्सले सार्वजनिक गरेअनुसार उनको सम्पत्ति १ दशमलव ५ बिलियन डलर छ। चौधरीले हरेक वर्ष लक्ष्मीपूजा महत्वका साथ गर्दै आएका छन्।
भर्खरै
लोकप्रिय
