प्रजातान्त्रिक गणतन्त्र कंगोमा फैलिएको इबोलाको महामारी अहिलेसम्मकै दोस्रो ठूलो रहेको संयुक्त राष्ट्रसंघीय स्वास्थ्य निकाय विश्व स्वास्थ्य संगठनले जनाएको छ ।
अहिले कंगोमा फैलिएको इबोला महामारी अहिलेसम्मकै दोस्रो भयानक रहेको र रोकथामका लागि थप प्रयासको खाँचो रहेको डब्लुएचओले उल्लेख गरेको छ ।
इबोलाको महामारीले ग्रस्त कंगोको बेनी शहरमा मात्रै अहिलेसम्म ४२६ जनामा इबोला भाइरसको संक्रमण रहेको देखिएको छ । यसको अर्थत युगाण्डामा सन् २००० मा फैलिएको इबोलाको महामारी भन्दा अहिले कंगोमा फैलिएको महामारी भयानक बनेको छ ।
बेनी प्रजातान्त्रिक गणतन्त्रको द्वन्द्वग्रस्त क्षेत्रको मध्य क्षेत्रमा पर्छ र महामारीविरुद्धको अभियान बिद्रोहीको आक्रमणका कारण प्रभावित भएको छ । अहिलेको महामारीका कारण झण्डै २०० जनाको ज्यान गइसकेको छ ।
यसअघि सन् २०१३ देखि २०१६ को बिचमा पश्चिम अफ्रिकी देशमा फैलिएको इबोला महामारीका कारण ११ हजार ३१० जनाको ज्यान गएको थियो र यो इतिहासकै ठूलो इबोला महामारी हो ।
कंगोमा यो वर्ष दोस्रोपटक इबोलाको संक्रमण फैलिएको हो । यसअघि देशको पश्चिमी क्षेत्रमा फैलिएको महामारीका कारण ३३ जनाको ज्यान गएको थियो ।
त्यसपछि गएको जुलाईदेखि देशको पूर्व क्षेत्रमा सुरु भएको महामारी अहिलेसम्म जारी छ । कंगोमा सन् १९७६ यता १० पटक इबोलाको महामारी फैलिएको छ ।
भर्खरै
लोकप्रिय
