क्यान्सरसँग जुधिरहेकी दुई वर्षकी बालिकाको उपचारका लागि दुर्लभ रगतको खोजी भइरहेको छ । क्यान्सरको उपचारका लागि रगत र रगतसँग जोडिएका तत्व दिनु पर्ने भए पनि आवश्यक रगत दुर्लभ भएकाले समस्या भएको हो ।
अमेरिकाकी दुई वर्षकी बालिका जेनब मुगललाई दुर्लभ प्रकारको क्यान्सर भएको छ र उनको रगत पनि दुर्लभ समूहको छ । यहि कारण उपचारमा समस्या भएको डाक्टरले बताएका छन् ।
जेनबको उपचारका लागि आवश्यक पर्ने रगतको खोजीमा चलाइएको अभियान अहिले विश्वव्यापी बनेको छ । एक हजार भन्दा बढी व्यक्तिको रगत परीक्षण गरिएकोमा उनलाई आवश्यक परेको जस्तो रगत मात्रै तीनजनामा भेट्टिएको अभियानकर्ताले बताएका छन् ।
जेनबको उपचारका लागि सातदेखि १० जना डोनर आवश्यक पर्ने डाक्टरले बताएका छन् ।
बुवा–आमासँग जेनब
यो वर्षको सुरुमा जेनबमा न्युरोब्लास्टोनामा नामक क्यान्सर देखिएको थियो र उपचार सुरु भएको हो । यो क्यान्सर दुर्लभ र आक्रामक हुन्छ । विशेष गरी शिशु र बालबालिकामा यसको संक्रमण देखिन्छ ।
उनको उपचारको क्रममा ‘ब्लड ट्रान्सफ्युजन’ आवश्यक हुन्छ । अर्थात रगतसहित रगतमा हुने विभिन्न तत्वहरु जेनबलाई डोनर मार्फत दिनु पर्छ ।
जेनबको रगत निकै दुर्लभ छ, किनकी उनको रगतमा इन्डियन बी भनिने एन्टीजेन छैन । यो एन्टीजेन धेरै व्यक्तिको रातो रक्तकोषमा हुने वन ब्लडले जनाएको छ । गैर नाफामुखी संस्था वन ब्लडले जेनबका लागि डोनरको खोजी अभियान चलाएको छ ।
जेनबका लागि सम्भावित डोनरमा पाकिस्तानी, इन्डियन वा इरानियन मुलका व्यक्ति जसको रगत ओ या ए समूहको भएको हुनु पर्ने वन ब्लडले जनाएको छ । यी व्यक्ति मध्ये चार प्रतिशत भन्दा कम व्यक्तिमा इन्डियन बी एन्टीजेन हुँदैन ।
सबै कुरा नमिलेसम्म जेनबको शरीरले दिइएको रगत स्वीकार गर्दैन । अहिलेसम्म अमेरिकामा दुई र बेलायतमा एक गरी तीन डोनर फेला पारिएको छ जसको रगतमा ती सबै कुरा मिल्नेछ जुन जेनबलाई चाहिएको छ ।
रगतले नै उनको रोग निको हुने होइन तर उपचारका लागि रगत नभइ नहुने भएकाले खोजी तीव्र पारिएको हो ।
जेनबका बुवा राहील मुगलले गएको सेप्टेम्बरमा छोरीको उपचार गरिएको बताए । आफूहरु आँसुमा डुबेको उनले बताएका छन् । जेनबसँग उनका बुवा र आमाको रगत पनि मिलेको छैन । त्यसपछि अरु डोनर खोज्ने अभियान सुरु भएको हो ।
तस्बिरहरु : वनब्लड, सिबिएस र गेट्टी इमेज
भर्खरै
लोकप्रिय
