धनगढी – कैलालीको मोहन्याल गाउँपालिकाकी उपाध्यक्ष पूजादेवी बुढामगरले गाउँपालिकामा आर्थिक अनियमितता भएको आरोप लगाएकी छन् ।
उनले गाउँपालिकाका प्रमुख प्रशासकीय अधिकृत गणेशदत्त ओझा र तीनजना वडाअध्यक्षहरुको मिलेमतोमा आर्थिक अनियमितता भइरहेको आरोप लगाईन् ।
गाउँपालिकाको कार्यालयबाट झण्डै ७५ किलोमिटर टाढा जिल्लाको सदरमुकाम आएर मंगलवार पत्रकार सम्मेलन गर्दै उपाध्यक्ष बुढामगर र कार्यपालिकाका सदस्य बिशाल पहराइले प्रमुख प्रशासकीय अधिकृत र तीनजना वडाअध्यक्षले मिलेमतोमा अनियमितता गरको आरोप लगाएकी हुन् ।
गाउँपालिकाका योजनाहरु अनुगमन गर्नका लागि छुट्ट्याइएको ३५ लाख रुपैयाँ एक पटक मात्र सडक आयोजनाको अनुगमन गरी सकिएको उपाध्यक्ष बुढामगर र कार्यपालिका सदस्य पहराईको जिकिर छ ।
बाटोको मात्रै अनुगमन भएको र अन्य योजनाको अनुगमन नै नगरी खर्च भएको देखाइएको उपाध्यक्ष बुढामगरको आरोप छ । उनी आफै अनुगमन समितिको संयोजक पनि हुन् तर एकपटक भन्दा धेरै अनुगमन नभएको उनले बताएकी हुन् ।
त्यस्तै कार्यपालिका सदस्य पहराईले बजेटको खर्चबारे सार्वजनिक सुनुवाई गर्न माग गर्दा प्रमुख प्रशासकीय अधिकृत ओझाले कानूनमा त्यो व्यवस्था नभएकोले जरुरी नभएको जवाफ दिँदै अटेर गरेको आरोप लगाए । गाउँ कार्यपालिका र गाउँसभाको निर्णय पश्चात पनि गाउँपालिकाको कार्यालय खिमडीमा स्थापना नभएको उपाध्यक्ष बुढामगरले बताए ।
उनले अहिले पनि कार्यालय धनगढी तारानगरको एक कोठामा रहेको बताए । कार्यालय सार्न पटक पटक भन्दा समेत विभिन्न बाहाना बनाएर प्रमुख प्रशासकीय अधिकृत ओझाले सार्न अटेर गरिरहेको उनको आरोप छ ।
कार्यालय सार्न नमानेको र आर्थिक अनियमितता भएको बिषयमा कुरा गर्न खोज्दा प्रमुख प्रशासकीय अधिकृत गणेशदत्त ओझाले आफूमाथि लगाइएका आरोपहरु निराधार भएको बताए । उनले उपाध्यक्ष बुढामगरकै नेतृत्वमा ३० वटा आयोजनाको अनुगमन गरिएको र सो अनुगमन पुस्तिकामा उपाध्यक्ष समेतको हस्ताक्षर रहेको दाबी गरे ।
भर्खरै
लोकप्रिय
