बार्सिलोना स्पेनिस कोपा डेल रे फुटबलको क्वाटरफाइनलमा पुग्न सफल भएको छ । पहिलो लेगमा २–१ ले पराजित भएको बार्सिलोनाले अन्तिम १६ को दोस्रो लेगमा लेभान्टेलाई ३–० ले हराउँदै समग्रमा ४–२ को जितसहित अन्तिम ८ मा स्थान पक्का गरेको हो । पहिलो लेगमा पराजित भएपछि बार्सिलोनाका लागि दोस्रो लेगको यात्रा निकै कठिन बनेको थियो ।
तर बिहीबार राति घरेलु मैदानमा भएको खेलमा लियोनल मेस्सी कप्तानीको बार्सिलोनाले उत्कृष्ट प्रदर्शन गरेको हो । बार्सिलोनाको जितमा पहिलो हाफमा उसमान डेम्बेलेले दुई तथा दोस्रो हाफमा मेस्सीले एक गोल गरे । डेम्बेलेले ३० र ३१ गरी दुई मिनेटभित्र दुई गोल गरेका हुन् । यस्तै मेस्सीले ५४ औँ मिनेटमा गोल गरेपछि बार्सिलोनाको दोस्रो लेगमा ३–० तथा समग्रमा ४–२ को जित निश्चित भयो ।
यस्तै बिहीबार राति नै भएको खेलमा रियल सोसिडाडसँग २–२ को बराबरी खेलेको रियल बेटिसले अवे गोलका आधारमा अन्तिम ८ मा स्थान पक्का गरेको छ । यस्तै भिल्ला रियललाई ३–१ ले हराएको स्पानियोलले समग्रमा ५–३ को जितसहित अन्तिम ८ मा स्थान बनाएको छ
भर्खरै
लोकप्रिय
