प्यारी सभ्यता,
मुटुकी टुक्रा
आज यहाँ जे कुरा भन्न लागेको छु, अलि अगाडि नै भन्ने प्रयास गरेको थिए। तर कसै गर्दा पनि हिम्मत जुटाउन सकिनँ । विगत ६ महिनादेखि मनमा गाँठो परेर बसेको कुरा फुकाउन आज आँट गरेको छु। कृपया धैर्यपूर्वक पढ है ?
तिमीलाई थाहै छ, चार्टर्ड एकाउन्टेन्सी ‘सीए’को पहिलो तह ‘क्याप वान’ मैले जुन सीए इन्स्टिच्युटमा पढेँ, सीएको दोश्रो तह ‘क्याप टु’ त्यही इन्स्टिच्युटमा पढ्नै मन लागेन । नयाँ इन्स्टिच्युटमा क्याप टु पढ्न गएको पहिलो दिन नै तिमीसँग भेट भएको हो ।
‘रूम नम्बर १८ कतिऔँ तलामा छ र ?’
सिँढी चढ्नै लाग्दा मैले तिमीलाई सोधेको थिएँ ।
‘हाम्रै त क्लास हो । सँगै जाऔँ’ तिमीले गज्ज्बको उत्साहका साथ भनेकी थियौ । सिंढी उक्लिँदा मैले तिमीलाई पछ्याएको थिएँ । तिम्रो शरीरबाट आएको पर्फ्युमको बासना मेरा नाकका पोरामा ठोक्किँदा तिमी मलाई क्लासरुम हैन स्वर्गको कुनै बगैंचामा लैजाँदै छौ झैँ लागेको थियो । तिम्रो त्यो मीठो रिप्लाई अनि अत्तरको मगमग बासनाले पहिलै दिन म तिमीप्रति आकर्षित भएको थिएँ । मनमा मायाको अंकुर त्यसैदिन टुसाएको थियो ।
भोलिपल्ट अलि छिटै क्लासरुम पुग्दा तिमी मात्र आएकी थियौ । कापीमा हतारहतार केही लेख्दै थियौ । शायद गृहकार्य गर्दै थियौ । अघिल्लो दिन एकाउन्ट्स सरले सबैसँग परिचय माग्दा तिमीले पनि आफ्नो नामथर भनेकी थियौ । तर मैले तिम्रो थर मात्र सुनेको थिएँ ।
‘तिमी के कार्की रे ?’
मैले यसरी आइसब्रेक गरेको थिएँ ।
‘सभ्यता कार्की ।’
अनि तिमी नि ?’
कापीबाट मुन्टो उठाएर एकछिन लेख्न बन्द गर्दै तिमीले भनेकी थियौ ।
‘प्रतीकपृथक पोखरेल’ ठाँटका साथ मैले भनेको थिएँ ।
घर कहाँ हो भनेर तिमीलाई सोध्दा ‘सुर्खेत’ भन्यौ अनि मैलेचाहिँ ‘सुनसरी’ ।
कालो टिशर्ट अनि निलो जिन्समा बिछट्टै राम्री देखिएकी थियौ तिमी त्यसदिन । त्यतिबेलै झन्डै ‘आई लभ यू’ भन्देको मैले ।
त्यस दिन माइक्रोमा कपनस्थित आफ्नो डेरा फर्कँदै गर्दा एउटा पुरानो कुरा याद आयो मलाई । एस.एल.सी लगत्तै (चैत ०६९) म ममीसँग बराहक्षेत्र गएको थिएँ । एकजना प्रकाण्ड ज्योतिषले मेरो चिना हेर्दै ममीलाई ‘छोरोले पश्चिमकी क्षेत्री ल्याउँछ’ भनेका थिए ।
त्यतिबेला मलाई यो कुरा हावा लागेको थियो । तर तिमीलाई भेटेपछि सभु त्यस ज्योतिषको अनुमान सत्य सावित भैदेओस् झैँ लाग्न थाल्यो। भगवानसँग पनि मेरो यही प्रार्थना छ । कार्कीकी छोरी अनि घर सुर्खेत । आहा !
दसैं बिदामा हामीले मेसेन्जरमा खूब च्याट गर्यौँ है ?
मैले तिमीलाई खसी कसरी पकाउने सोध्दा तिमीले आफुलाई पानी तताउन बाहेक किचेनको अरु केही काम गर्न आउँदैन भनेकी थियौ । त्यस दिन तिम्रो औधी माया लागेको थियो।
बेबी म त किचेनको हिरो हो नि ! मैले पकाउन नजानेको जिनिस केही छैन । धेरैले भन्छ्न् मेरो हातमा जादु छ । मेरो यस प्रेमपत्र स्वीकारी कालान्तरमा मेरी श्रीमती बन्यौ भने तिमीलाई बिहानबेलुकै किचेनमा साथ दिनेछु । साथै मीठामीठा परिकार बनाउन पनि सिकाउनेछु ।
तिमी सलमान खानकी फ्यान है ?
क्लासमा पनि हरिभक्ती र भावनासँग सल्लुकै चर्चा गरिरहेकी हुन्छ्यौ ।
फेसबुकको कभर फोटोमा पनि ‘किप काल्म यान्ड लभ सलमान खान पिक्चर कोट राखेकी छ्यौ । म सल्लुको उतिसारो फ्यान नभएपनि उसको जुनसुकै फिल्म रिलिज भएकै दिन तिमीलाई हल लिएर जानेछु । अनि पपकर्न खाँदै मुभी इन्जोय गर्नुपर्छ ।
तिमी रोमान्स उपन्यासकी पारखी है ?
फाट्टफुट्ट कविता पनि कोर्छ्यौ । तिमीले पढी वा लेखिरहेको बेला कहिल्यै डिस्टर्ब गर्दिनँ । कलम खोसिदिन्नँ । बत्ती निभाइदिन्नँ ।
माछा तिम्रो फेब्रेट है ? बेलाबेला धादिङ लगेर मलेखुको माछा खुवाउँछु तिमीलाई । वैवाहिक बन्धनमा बाँधिएपछि हप्तामा कम्तीमा पनि दुईपल्ट माछाभात खानुपर्छ । बेलुकी प्रायजसो एउटै थालमा माम खानुपर्छ । म तिमीलाई खुवाइदिन्छु यान्ड भाइसी भर्सा ।
अस्ति तिहारमा धन तेरसको दिन टिनको सानो खुत्रुक्के किनेको छु । लक्ष्मी पुजाको दिनबाट यसमा प्रत्येक दिन रु २० राख्ने गरेको छु । अहिले त रु २००० पुग्न लागिसक्यो । यो पैसा तिमीलाई आइसक्रीम खुवाउन जम्मा पार्दैछु । तिम्री बेञ्चमेट हरिभक्तीले मलाई भनिसकी कि तिमीलाई आइसक्रीम औधी मीठो लाग्छ ।
हेर न बेबी ! तिमीले गर्दा मेरो बचत गर्ने बानी बसेको छ । थ्याङ्क यु सो मच ।
सभु तिमी क्लास आउँदा रातो टीका लगाएर आउँछ्यौ है ?
आफै पूजा गर्छौ कि मामुले पूजा गरेर लगाइदिसिन्छ भनेर मैले सोध्दा आफैँ पनि गर्छु भनेकी थियौ है। आहा कस्ती संस्कारी छोरी ! घाँटीमा पनि रुद्राक्षको माला पहिरिएकी छौ । मलाई पनि ईश्वरमा आस्था छ । मैले आफ्नो कोठामा पुजा गर्ने सानो स्थान बनाएको छु । टीका नलगाए पनि म प्रत्येक बिहान भगवानको पूजा गर्छु । भागवद् गीताका मलाई ५० बढी श्लोक कन्ठस्थ छ्न् । हामी दुबैजना धार्मिक ! हाउ नाइस !
श्रीमान–श्रीमती बनेपछि बिहान सबेरै उठ्नु पर्छ । पालैपालो नित्यकर्म फत्ते गरेर सँगै नुहाउनु पर्छ । अनि पूजा गर्न बस्नुपर्छ । टीका लगाइदिन्छु। सिन्दुर पनि । श्रीमान हुँदाहुँदै पनि मोडर्न बन्ने नाममा सिन्दुरपोते परित्याग गर्ने आईमाई मलाई पटक्कै मन पर्दैनन् । तिमीचाहिँ सधैँसधैँ सिन्दुरपोते लगाऊ है बेबी !
सभु तिमीले सार्थकलाई दाइ बनाइदियौ है ? त्यो केटो एक नम्बरको बोका हो । रोयल इन्फिल्ड (बुलेट) बाइकको आडमा केटीहरुलाई पट्याउँछ अनि युज गरेर छोडिदिन्छ । मानौ केटीहरु उसका लागि चुइगम हुन्, बयर हुन् । तिमीले उसलाई दाइ बनाएको खुशीयालीमा मैले मेरा डेस्क पार्टनर्सलाई पेट चर्किने गरी रोटीतरकारी खुवाएँ नि अस्ति मङ्सिरमा । साँझ डेरा फर्किएपछि पनि स्कुल पढ्दाको फेब्रेट गीत ‘प्रेमकी नैयाँ है रामके भरोसे अप्नी ई नैयाँको पार तु लगा हि दे’ बोलको गीत लुपमा बजाएर खूब नाचेँ ।
म घुमफिरको सौखिन हुँ। मेरी बन्यौ भने म तिमीलाई सिङ्गो नेपाल अनि आधा पृथ्वी घुमाउने छु।
सीएको पढाइ गाह्रो हुँदाहुँदै पनि तिमीले हिम्मत गरेर पढ्न आएकी छ्यौ । मलाई तिमीजस्तै आँटिली छोरी मनपर्छ । मेरा छोराछोरीको अनुहारमा म तिम्रै प्रतिबिम्ब देख्न चाहन्छु ।
हरेक रात तिमीलाई छातीमा टाँसेर निदाउन पाऊँ । मेरो छातीमा हुँदा तिमीले आफूलाई संसारकै भाग्यमानी र सुरक्षित ठाने । सभु म तिमीलाई तिम्री मामुले गरेजस्तै माया गर्नेछु । जसरी तिम्रो मामुको लागि तिम्रो कुनै विकल्प छैन, त्यसरी नै मेरा लागि पनि तिम्रो कुनै विकल्प हुन सक्दैन।
यस्ता कुरा जति गरे पनि सकिँदैनन् बेबी। महाकाव्य नै लेख्न सकिएला । बट आई ट्रुली लभ यु सभ्यता कार्की । प्रतीक र सभ्यताको जोडी । पूर्व र पश्चिमको जोडी । सुनसरी र सुर्खेतको जोडी । यस संसारकै बेस्ट जोडी । विल यु प्लिज बि माई भ्यालेन्टाइन्स वान्स एन्ड फर अल सभु ? आई लभ यु ।
उही तिमीलाई धेरैधेरै माया गर्ने,
प्रतीकपृथक पोखरेल
भर्खरै
लोकप्रिय
