‘घर पुगेपछि थाहा भयो शरीरमा बमले चोट लागेको, त्यसपछि पुगियो अस्पताल’

काठमाडौँ – ललितपुरको नख्खुमा रहेको एनसेलको मुख्य कार्यालय अगाडि शुक्रबार बेलुका भएको बम बिस्फोटमा परि घाइते भएका दुईजनाको उपचार भइरहेको छ । एकजनाको मृत्यु भएको छ ।

घाइते हुनेमा २६ वर्षकी प्रतीक्षा खड्काको शल्यक्रिया भएको डाक्टरले बताएका छन् । शल्यक्रिया सफल भएको र अवस्था सुधार हुँदै गएको डाक्टरले जानकारी दिएको प्रतीक्षाका श्रीमान रितेश खड्काले बताएका छन् । प्रतीक्षालाई जनरल वार्डमा सार्ने तयारी भइरहेको छ ।

प्रतीक्षाका श्रीमान रितेश खड्का

आफूहरु एक्वेरियममा राख्ने माछा लिन नख्खु आएको बेला बिस्फोट भएको रितेशले बताए । रितेशले देश सञ्चारसँग भने, ‘हामी शुक्रबार बेलुका एक्वेरियममा राख्ने माछा लिन आएका थियौँ । माछा लिएर फर्किँदै थियौँ, विष्णुदेवी मन्दिर नजिक पुग्दा बिस्फोट भयो । उनी (प्रतीक्षा) बाइकको पछाडि थिइन् । त्यो बेला केही थाहा भएन । घर गएपछि उनको शरीरको पछाडिको भागबाट रगत बगेको देखियो ।’

बागडोल बस्दै आएका रितेशले भने, ‘त्यसपछि हामी अस्पताल आउन खोज्यौँ । मेडिसिटी आउन बाटो जाम थियो । पहिले अल्का अस्पताल गयौँ । त्यहाँबाट गम्भीर देखेर मेडिसिटी पठाएको हो ।’

प्रतीक्षाको शरीरको पछाडिको भागको दायाँ तिर चोट लागेको हो । शल्यक्रिया गरेर डाक्टरले प्रतीक्षाको शरीरमा छिरेको बमको छर्रा निकालेका छन् ।

यस्तै अर्की घाइते २५ वर्षकी उरुषा मानन्धरको शल्यक्रिया हुँदैछ । उरुषा मेडिसिटी अस्पतालकै नर्स हुन् । काभ्रेको बनेपा घर भएकी उरुषा नैकापस्थित मामा घरमा बस्दै आएकी छन् ।

शुक्रबार बेलुका अस्पतालमा ड्युटी सकेर मामा घरको दाइसँग घर फर्किने क्रममा बिस्फोटमा परेको उनकी बहिनी एकिना मानन्धरले देश सञ्चारलाई बताइन् ।

उरुषाको बायाँ गोडामा चोट लागेको छ । बमको छर्राले उरुषाले बोकेको झोलामा प्वाल परेको र भित्र रहेको टिफिनमा पनि प्वाल परेको थियो । उरुषाको उपचारमा डा. निभा चित्रकार संलग्न छन्।

बिस्फोटमा गम्भीर घाइते भएका लमजुङका सिंहप्रसाद गुरुङको उपचारको क्रममा शुक्रबार राति मृत्यु भएको छ ।

यो पनि पढ्नुहोस्

नख्खु बम बिस्फोटमा घाइते भएका एकजनाको मृत्यु