काठमाडौँ – ललितपुरको नख्खुमा रहेको एनसेलको कार्यालय अगाडि शुक्रबार बेलुका भएको बम बिस्फोटमा ४९ वर्षका सिंहप्रसाद गुरुङको मृत्यु भयो । लमजुङ पुर्ख्यौली घर भएका गुरुङ भैँसेपाटीका बासिन्दा हुन् ।
शुक्रबार बेलुका साथीहरुसँग बिदा भएर घर जान लागेका सिंहबहादुर बम बिस्फोटमा परेका हुन् । उनको बायाँ खुट्टा क्षतिविक्षत भएको थियो भने दायाँ खुट्टाको गोलीगाँठोमुनिको भाग थिएन । टाउकोमा बमको छर्रा लागेका उनको शरीरमा चोट थियो ।
बिस्फोट लगत्तै उनलाई उपचारका लागि मेडिसिटी अस्पताल लगिएको थियो । उपचारकै क्रममा शुक्रबार राति उनको मृत्यु भयो ।
सिंगापुर प्रहरीका सेवा निवृत लाहुरे सिंहप्रसाद शुक्रबार साथीहरुसँगको भेटघाटका लागि घरबाट निस्केका थिए । साँझ साथीहरुसँग बिदा भएर घर जाँदै गरेका बेला उनी बिस्फोटमा परेको साथी राम गुरुङले देश सञ्चारलाई जानकारी दिए ।
सिंहप्रसादका दुई छोरी र एक छोरा तथा श्रीमती छन् । उनको शव अहिले मेडिसिटी अस्पतालको शव गृहमा राखिएको छ । अस्पतालमा आफन्तको भिड लागेको छ ।
चार दाजुभाइ मध्येका कान्छा सिंहबहादुरका दुई दाइ अहिले अस्पतालमा छन् । उनको शव पोष्टमार्टका लागि पाटन अस्पताल लैजाने तयारी छ ।
यो पनि पढ्नुहोस्
भर्खरै
लोकप्रिय
