काठमाडौं – बारा र पर्साका विभिन्न ठाउँमा आइतबार बेलुका आएको हावाह्रीका कारण मृत्यु हुनेको संख्या २७ पुगेको प्रहरीले जनाएको छ ।
देश सञ्चारसँगको कुराकानीमा बाराका डिएसपी हेमबहादुर शाहीले अहिलेसम्म बारामा २६ र पर्सामा एक जना गरी २७ जनाको ज्यान गएको पुष्टि भएको र धेरै मानिस घाइते रहेको बताए । उनका अनुसार ठूलो संख्यामा हताहती भएको छ ।
भौतिक क्षति व्यापक भएको उनले बताए । जिल्लाका विभिन्न ठाउँमा उद्धारका लागि प्रहरीसहितको टोली खटिएको उनले बताए ।
घाइतेहरुलाई उपचारका लागि स्थानीय अस्पताल लगिरहेको र ज्यान गुमाउनेको पहिचान भएको डिएसपी शाहीले बताए । सुरुमा हल्का हवा र पानी आएकोमा केहीबेरमै हावाले भयानक रुप लिएको उनले बताए ।
विशेष गरी दुई नम्बर प्रदेशको बारा, पर्सालगायतका जिल्लामा हावा हुरीसँगै आएको पानीका कारण धनजनको क्षति भएको प्रधानमन्त्री केपी शर्मा ओलीले ट्वीटमार्फत जनाएका छन् ।
उनले राति १०ः४५ बजे ट्वीट गर्दै हावाहुरीका कारण २५ जनाको मृत्युभएको र चारसय जना घाइते भएको विवरण प्राप्त भएको जनाएका छन् । घटनामा मृतक तथा घाइतेको संख्या बढ्न सक्ने जनाइएको छ ।
प्रधानमन्त्री ओलीले उद्दारमा सुरक्षाकर्मी परिचालित गरिएको जानकारी दिँदै घाइतेको उद्दारमा र उपचारमा कुनै कमी आउन नदिन सम्बन्धित निकायलाई निर्देशन दिइएको जानकारी दिएका छन् ।
हालसम्म २५ जनाको ज्यान गएको र करीब ४०० घाईते भएको जानकारीमा आएकोछ। मृत्युबरण गर्नेहरूप्रति शोकव्यक्त गर्दछु। र, शोकाकुल परिवारजनमा गहिरो समवेदना प्रकट गर्दछु ।
— K P Sharma Oli (@kpsharmaoli) March 31, 2019
बारा/पर्सा जिल्लाको केही स्थानमा अहिले सॉझ आएको डरलाग्दो ऑधि/हुरीबाट धनजनको अकल्पनीय क्षति भएको जानकारीमा आएकोछ। यस आकस्मिक क्षतिप्रति गहिरो दु:ख व्यक्त गर्दछु। उद्दारमा सुरक्षाकर्मीहरू परिचालित भईसकेका छन्।उद्दारमा गंभीर हुन र घाईतेको उपचारमा कुनै कमी आउन नदिन निर्देशित गरिएकोछ।
— K P Sharma Oli (@kpsharmaoli) March 31, 2019
भर्खरै
लोकप्रिय
