बारा -बारा र पर्सा जिल्लामा आएको भीषण हावाहुरीले २९ जनाको ज्यान गुम्यो । ६ सय भन्दा धेरै घाइते छन् । प्रधानमन्त्री केपी शर्मा ओलीसहितका मन्त्रीहरुले घटनास्थलको हवाई निरीक्षण गरे । अस्पतालमा रहेका केही घाइतेसँग भेटघाट गरे ।
त्यस क्रममा प्रधानमन्त्री ओलीले पीडितहरुका लागि राहत र उद्धारको काममा कुनै कसर बाँकी नराख्न निर्देशन दिए । तर हुरीबतास पीडितहरु घटनाको तेस्रो दिनसम्म पनि राहतका नाममा एक प्याकेट चाउचाउ र पानीको बोतल समेत पाउन नसकेर छटपटाइरहेका छन् ।
त्रिपाल समेत नहुँदा खुला आकाशमुनि रात बिताउन बाध्य पीडितहरुको बिचल्ली भएको छ । उनीहरुलाई केही संघ संस्थाको सहयोगमा राहत सामग्री उपलब्ध गराइए पनि त्यो पर्याप्त भएको छैन ।
सरकारी अधिकारीहरुले राहत पठाइसकिएको दाबी गरेपनि घरबास र अन्नपात गुमेका पीडितहरु खाना नपाएर भोकभोकै छटपटाइरहेका छन् । विशेष गरि बालबालिका तथा उमेर पुगेका ज्येष्ठ नागरिकहरुलाई थप समस्या भएको छ ।
हुन त केही संघ संस्थाको सहयोगमा सडकमै खाना पकाउने व्यवस्था गरिएको थियो । तर पीडित धेरै राहत थोरै भएपछि पीडितहरुले खाना पाउने आशमा बोकेका थालहरु रित्ता देखिएका छन् ।
प्रधानमन्त्री ओलीले हवाई निरीक्षण गरेर फर्केको तर राहत नपठाएको भन्दै पीडितहरु निराश छन् ।
भर्खरै
लोकप्रिय
