काठमाडौँ-कर्मचारी समायोजनका क्रममा आफूहरुमाथि अन्याय भएको भन्दै पाँच दिनदेखि आन्दोलनरत सरकारी चिकित्सकले सरकारको दमन नभएर वार्ता गर्न आग्रह गरेका छन्।
सरकारी चिकित्सक संघ (गोदान)ले मंगलबार विज्ञप्ति जारी गर्दै सरकारलाई आफूहरुले आन्दोलन गर्नुपर्ने अवस्था सिर्जना नगर्न आग्रह गरेको हो।
स्वास्थ्य तथा जनसंख्या मन्त्रालयले सरकारले ठिक ढंगबाट कर्मचारीको समायोजन गर्न लागेको र अत्यावश्यक सेवा बन्द गरेर हड्तालमा उत्रिए उनीहरुमाथि नै कारवाही गर्ने चेतावनी दिएको थियो।
सरकारले वार्ताका लागि एक पटक पनि नबोलाई आफुहरुको आन्दोलनलाई दमन गरेर जाने भए सरकारविरुद्ध नै जाइलाग्ने चेतावनी चिकित्सकले दिएका छन्।
‘सरकार चिकित्सकहरूलाई दमन गरेरै जाने मनस्थितिमा उत्रिएमा भने सम्पूर्ण सरकारी चिकित्सक झनै कठोर आन्दोलनको अप्रिय मार्गमा जान बाध्य हुने छ,’ विज्ञप्तिमा उल्लेख गरिएको छ।
संघको जायज मागरूलाई दबाउने, चिकित्सकलाई डराउने, धम्क्याउने जस्ता क्रियाकलापले सरकारपक्ष आफनो आन्दोलनलाई थप कडा भन्दा कडा बनाउन चाहेको जस्तो देखिएको आशंका उसले व्यक्त गरेको छ।
भर्खरै
लोकप्रिय
