काठमाडौँ – विश्वको सर्वोच्च शिखर सगरमाथाको उचाई नाप्नका लागि नेपाली विज्ञसहितको टोली बुधबार त्यसतर्फ प्रस्थान गरेको छ । चार सदस्यीय विज्ञ टोली तथा गाइडसहितको टोलीलाई प्रधानमन्त्री केपी शर्मा ओली र भूमि सुधार मन्त्री पद्यमा अर्यालले बालुवाटारमा आयोजित विशेष कार्यक्रममा बिदाई गरेका छन् ।
लुक्ला प्रस्थान गरेको टोलीमा खिमलाल गौतम, रवीन कार्की, सुरजसिंह भण्डारी र युवराज धिताल छन् । उनीहरुको साथमा गाइडको टोली पनि छ । प्रधानमन्त्री ओलीले बुधबार बिहान बालुवाटारमा भएको बिदाई कार्यक्रममा टोलीलाई शुभकामना दिँदै पहिले आफ्नो सुरक्षालाई ध्यानमा राखेर काम गर्न आग्रह गरे ।
उनले गाइडले भने अनुसार नै अघि बढ्न टोलीलाई निर्देशन समेत दिएका छन् । प्रधानमन्त्री ओलीले नेपाली टोलीले गरेको मापन नै अन्तिम र आधिकारिक हुने पनि बताए । नेपालले सगरमाथाको उचाई मापन गर्न लागेको यो पहिलो पटक हो ।
२०७२ सालमा भूकम्प गएपछि देखि नै सगरमाथाको उचाई मापन गर्ने भनिएको थियो । यसअघि चीन र भारतले दुई दुई तथा अमेरिका र इटालीले एक एक पटक सगरमाथाको उचाई मापन गरेका थिए । सबै मापनमा उचाई फरक फरक आएको थियो ।
सबैभन्दा पहिले भारतमा उपनिवेश कायम गरेको ब्रिटिस इन्डियाले सन् १८४९ मा सगरमाथाको उचाई मापन गरिएको थियो । पुरानो प्रविधिबाट गरिएको मापनमा सगरमाथाको उचाई ८८४०.५० मिटर आएको थियो । त्यसपछि सन् १९५४ मा भारतले नै गरेको मापनमा सगरमाथाको उचाई ८८४८ मिटर आएको थियो ।
सन् १९९२ मा इटालीको टोलीले गरेको मापनमा ८८४८.६५ तथा १९९५ मा चीनले गरेको मापनमा ८८४८.१३ मिटर देखिएको थियो । यस्तै सन् २००० मा अमेरिकी टोलीले गरेको मापनमा ८८५० तथा सन् २००५ मा चीनले गरेको मापनमा ८८४४.४३ मिटर देखिएको थियो ।
अहिले मापनमा खटिएको टोलीले यहि आर्थिक वर्ष भित्रै मापनको काम सक्ने बताइएको छ ।
भर्खरै
लोकप्रिय
