जनकपुरधाम-सञ्चार तथा सुचना प्रविधि मन्त्री गोकुल बाँस्कोटाले राजपाले बिना कुनै मुद्दाको आन्दोलन गर्नुको औचित्य नरहेको बताएका छन् ।
जनकपुरधाम विमानस्थलमा बुधबार पत्रकारहरुसंग कुरा गर्दै मन्त्री बाँस्कोटाले अदालतको विषयलाई सरकारसंग जोडेर आन्दोलन गर्नुको कुनै औचित्य नरहेको बताए।
प्रजातन्त्रमा जो कोहीलाई पनि आफ्नो मागलाई लिएर आन्दोलन गर्ने नैसर्गिक अधिकार रहेको बताउँदै मन्त्री बास्कोटाले वार्ताको माध्यमले समस्याको हल खोज्न आग्रह समेत गरेका छन्।
उनले भने‘राजपालाई आन्दोलन गर्ने नैसर्गिक अधिकार छ, तर उनीहरुले नन इस्युलाई इस्यु बनाएर आन्दोलन गरिरहेका छन्।’ उनले राजपाले अदालतको विषयलाई सरकारसंग जोडेर आन्दोलन शुरु गर्नु गैर प्रजातान्त्रिक चरित्र रहेको आरोप लगाए।
उनले भने‘ अदालतको विषयलाई लिएर आन्दोलन नगर्नुस, कुनै समस्या छन् भने वार्ताको टेबलमा बसेर समाधान खोजौँ।’उनले सरकार कुनै पनि असन्तुष्ट पक्षको जायज माग पूरा गर्न तत्पर रहेको बताए।
यस्तै अर्को प्रसंगमा उनले नेपालको कुनै पनि नागरिक नागरिकताबाट बञ्चित नहुने प्रतिबद्धता व्यक्त गरेका छन्। सर्वोच्चले जारी गरेको अन्तरिम आदेश स्थायी आदेश नरहेको भन्दै उनले चाँडै नै नागरिकता सम्बन्धी समस्या समाधान हुने बताए। सरकार अब सुशासन तथा पारदर्शी समाज निर्माणमा केन्द्रित रहेको उनको भनाई थियो।
भर्खरै
लोकप्रिय
