पोखरा – गण्डकी प्रदेश मुख्यमन्त्री पृथ्वीसुब्बा गुरुङले गत वर्ष भर्ना अभियानमा अभिभावकत्व लिएकी ‘छोरी’ शिखा जिरेलले तृतीय स्थान हाँसिल गर्दै माथिल्लो कक्षामा गएकी छन् ।
मुख्यमन्त्री गुरुङले श्रीकृष्ण माध्यमिक विद्यालय मासबार कक्षा १ मा भर्ना गराएर पढ्न थालेकी शिखाले ९४ प्रतिशत अंक ल्याएर तृतीय भएकी हुन् । उनीसहित कक्षा १ मा ३० जना विद्यार्थी थिए।
मुख्यमन्त्री गुरुङले अभिभावकत्व लिएका ‘छोरा’ अभिषेक नेपाली पनि पास भएका छन् ।
अभिषेकलाई मुख्यमन्त्री गुरुङले कक्षा २ मा भर्ना गराएका थिए । उनीसहित कक्षामा २२ विद्यार्थी थिए । वर्षको अन्तिम प्रकाशित नजिता अनुसार उनी २१ औँ स्थानमा छन् ।
मुख्यमन्त्री गुरुङले अभिभावकत्व लिएका ‘छोरा–छोरी’ दुवै पास भएपछि विद्यालय परिवार नै हर्षित भएको प्राध्यानाध्यापक टीकाराम लामिछानेले बताए ।
‘जनप्रतिनिधिले अभिभाकत्व लिएका विद्यार्थीप्रति धेरैको ध्यान हुन्छ । विद्यार्थीले पनि सोही अनुसार मेहनत गरेर नजिता ल्याएका छन्’, उनले भने, ‘यसले सरकारी सामुदायिक विद्यालयको गरिमालाई पनि उचो राख्छ ।’
शिक्षक घनश्याम अधिकारीले भने, ‘शिखा जिरेल अलि चलाख नै छन् । कक्षामा पनि मन लगाएर पढ्छिन् विद्यालयमा दिएको गृहकार्य पनि सबै गर्छिन् ।’
अभिषेकको बुबाको निधन भएपछि भने पढाईमा केही सुस्सता देखिएको शिक्षक अधिकारीको भनाई छ ।
‘उनको पनि पढाई नराम्रो त भन्न मिल्दैन तर पनि घरायसी कारणले पनि बच्चाको ध्यान पढाईमा केन्द्रीत नभएको हो की जस्तो मात्रै’ उनले भने ।
शिखाको परिवार दोलखाबाट पोखरा आएका हुन् । उनका बुबा मजदुरी गर्छन् । आमाको भने टेलरिङ व्यवसाय रहेको विद्यालयले जानकारी दियो ।
अभिषेकको बुवा गतवर्ष बितेका हुन् । उनीहरु स्याङ्जा आँधीखोला गाउँपालिका सिरुबारीदेखि पोखरा आएर घारीपाटनस्थित बस्दै आएका छन् ।
दुवै परिवारको आर्थिक अवस्था कमजोर भएकाले मुख्यमन्त्रीले विपन्न व्यक्तिका छोराछोरीलाई अभिभावकत्व प्रदान गरेर सकारात्मक सन्देश दिएको प्राध्यानाध्यपक लामिछानेले सुनाए ।
‘यससँगै पढ्नुपर्छ भन्ने उत्प्रेरणा पनि विकास भएको छ । भर्ना अभियानले सरकारी विद्यालयमा एक किसिमको जागरण ल्याएको छ । जनप्रतिनिधिको सहकार्य निरन्तर हुनुपर्छ’ उनले थपे ।
सोही विद्यालयमा गण्डकी प्रदेश उपसभामुख सिर्जना शर्माको ‘छोरा’ समेत अध्ययन गर्छन् । गत वर्षकै भर्ना अभियानमा उपसभामुख शर्माले कक्षा ४ मा कुशल विकलाई भनाई गराएर अभिभावकत्क लिएकी थिइन् ।
कुशल पास भएर कक्षा ५ मा उक्लेका छन् । उनको पढाई मध्यम रहेको विद्यालयले जानकारी दियो । विद्यालयमा नर्सरीदेखि कक्षा १० सम्म पठनपाठन हुँदै आएको छ । नर्सरीदेखि ९ कक्षासम्म अंग्रेजी माध्यममा पढाई हुन्छ ।
विद्यालयमा पुगेनन् मुख्यमन्त्री
मुख्यमन्त्री गुरुङले अभिभावकत्व लिएका ‘छोरा–छोरी’ को पढाई प्रगतिबारे कमै चासो राख्छन् ।
गतवर्ष कक्षा १ मा शिखा जिरेल र कक्षा २ मा अभिषेक नेपालीलाई भर्ना गराएपछि उनले विद्यालयमा पाइला राखेनन् ।
उनीहरु नियमित स्कुल आएका छन्, छैनन भन्नेबारे समेत उनले विद्यालयमा सोधनी नगरेको पाइयो ।
विद्यालयका प्राध्यानाध्यापक टीकाराम लामिछानेका अनुसार मुख्यमन्त्रीले एकपटक फोन मार्फत भए पनि सम्पर्क राखेनन् ।
‘अभिभावकत्व लिएपछि उनीहरुको पठनपाठनदेखि सबै कुराहरुको जिम्मेवारी लिनुपर्ने हो । विद्यालयमा बेलाबेलामा आउनुपर्ने जस्तो लाग्छ उहाँ आउनुभएन । सायद व्यस्त भएर होला’ उनले भने ।
घरपरिवारको सदस्यलाई भेट्नु हुन्छ भन्ने सुनेको थिएँ तर आधिकारिक थाहा नभएको उनले सुनाए । ‘अभिषेकको बुबा बित्दा घरमै गएर भेट्नु भएको भन्ने सुनेको चाहिँ हो ।
कुन विद्यार्थीका कुन अभिभावक हुन् हामीलाई चिन्न गाह्रो । आएको बेला सोधौँ भनेको । मेसो भएन’ उनले थपे ।
उपसभामुख सिर्जना शर्मा भने वर्षदिनमा तीनपटक विद्यालय पुगेर सोधेको प्राध्यानाध्यापकले बताए । नतिजाबारे उनले चासो राख्ने गरेको पाइयो ।
कुशलको आँखामा केही समस्या देखिएपछि विद्यालयको सूचनामा उपसभामुख मार्फत उपचार गराई चश्मा लगाएका छन् ।
लत्ताकपडा र पाठ्यसामग्री सहितको शिक्षण शुल्क, यातायात भाडा उपसभामुख आफैले जिम्मेवारी लिँदै आएको जानकारी दिइन् ।
कुशल घारीपाटन बस्दै आएका छन् । उनको पारिवारिक स्थिती कमजोर छ ।
सांसद अधिकारीका दुवै छोरा उत्कृष्ट
कास्की क्षेत्र नं. १ बाट निर्वाचित प्रतिनिधिसभा सांसद खगराज अधिकारीका दुबै ‘छोरा’ ले कक्षामा उत्कृष्ट नतिजा ल्याएका छन् ।
गतवर्ष भर्ना अभियानकै क्रममा सांसद अधिकारीले सौरभ रानाभाट र यमन सुनारलाई कक्षा १ मा भर्ना गराएका थिए । सौरभले कक्षामा दोस्रो स्थान हाँसिल गरेका छन् भने यमनले तृतीय स्थानसहित कक्षा उक्लेका छन् ।
अधिकारीले आफ्नो जन्मगाउँ बेगनासमा रहेको आनन्द ज्योती माध्यमिक विद्यालयमा उनीहरुलाई भर्ना गराउँदै उच्च शिक्षासम्मको सम्पूर्ण जिम्मेवारी आफूले लिने घोषणा गरेका थिए ।
उनीहरु दुबैलाई कक्षा २ मा आवश्यक पाठ्यसामग्री विद्यालयमै पुगेर हस्तान्तरण गरिसकेका छन् ।
‘तपाइँहरुले आआफ्नो कक्षामा राम्रो नजिता ल्याएर मलाई गौरव अनुभूति दिलाउनु भएको छ । राम्रो गर्दै जानु शुभकामना’ सांसद अधिकारीले पाठ्यसामग्री हस्तान्तरण गर्दै गरेको तस्बिरसहित फेसबुकमा लेखेका छन् ।
भर्खरै
लोकप्रिय
