काठमाडौँ-अनामनगरस्थित मण्डला थिएटरमा नाटक ‘मिता आब कोना चलब ?’ मञ्चन भइरहेको छ। पहाड र मधेशलाई हेर्ने दृष्टिकोण परिवर्तन गरी सद्भाव र एकता कायम गर्न आह्वान गरिएको नाटकमा कलाकार रामभजन कामतको लेखन तथा निर्देशन रहेको छ।
नाटकमा पहाडी र मधेशीबीच उत्पन्न हुने मतभेद, यसले निम्त्याएका विभिन्न कारक र आपसी सद्भावका लागि समुदायबाटै गरिएका प्रयत्नका विषय वस्तुलाई नाटकमार्फत उठाउन खोजिएको निर्देशक कामतले बताए।
‘दुई पटक मधेश आन्दोलनका क्रममा पहाडी र मधेशी समुदायबीचको अन्तरद्वन्द्वले ज्यादै नकारात्मक प्रभाव पार्यो,’ कामतले भने, ‘जसका कारण तराईमा बस्ने पहाडीमूलका र पहाडमा बस्ने मधेशी मूलका जनताले लामो समयसम्म तनाव झेल्नु पर्यो, तर भावनात्मक र आपसी एकताका कारण यो अवस्था लामो समय रहेन, जनतामा एकता पुनःकायम भयो, यही विषयलाई नाटकमार्फत प्रस्तुत गरिएको छ।’
साथै ‘मिता आबको नाच लब’ले मधेश आन्दोलन पछिको तराईका नागरिकमा सिर्जित मनोविज्ञानलाई पनि प्रस्तुत गरेको छ। ‘मिता आब कोना चलब’’को अर्थ मितज्यू अब कसरी जाने भएको निर्देशकले बताए। नेपाली र मैथिली दुवै भाषा प्रयोग गरिएको नाटकमा सामान्य कृषि कर्म गर्ने व्यक्तिको परिवारमा पर्ने गरेको असरलाई सरल शैलीमा प्रस्तुत गरिएको छ।
नाटमा सुनिता घिमिरे, कौशिला कामत, मिलन नेपाली, विकास पराजुली, राजेश ठाकुर, भरत कार्की, सञ्जय गुप्ता, आदित्य मिश्रा, अमृता श्रेष्ठ, अमृत स्वाँर र शंकर पोखरेलले अभिनय गरेका छन्। यही वैशाख २० गतेदेखि मञ्चन भइरहेको नाटक जेठ पाँच गतेसम्म चल्नेछ।
भर्खरै
लोकप्रिय
