धनगढी- बझाङको छबिसपाथीभेरा गाउँपालिका कार्यालयको मुल ढोकामा मंगलवार अज्ञात समुहले राखेको बम नेपाली सेनाको टोलीले निस्क्रियपारेको छ।
कार्यालयको ढोकामा कागजले बेरिएको शंकास्पद बस्तु बिहान कर्मचारीहरुले देखेपछि जिल्लाबाट प्रहरी सहित नेपाली सेनाको टोली घटनास्थल पुगेको थियो। मुख्य ढोकामा बम हुदा कर्मचारीहरु र जनप्रतिनिधीहरु कार्यालय भित्र जान नसकेर गाउँपालिकाको काम प्रभावित भएको थियो।
दिउसो तिर नेपाली सेनाको प्राबिधीक टोलीले बम निस्क्रियगरेपछि कार्यालयको काम सुचारु भएको प्रहरी नायब उपरिक्षक सूर्य केसीले जानकारी दिए।उनले भने–‘गाउँपालिकालाई नेकपा बिप्लव समुहले चन्दा माग गरेको तथा गाउँपालिकाले चन्दा नदिएपछि बिप्लव समुह कार्यकर्ताबाट बम राखेको हुन सक्ने आशंका भएकाले त्यस क्षेत्रमा रहेका बिप्लव समुहका कार्यकर्ताहरुको खोजीका लागि सुरक्षाकर्मी परिचालन गरिएको छ।’
पछिल्लो समयमा बिप्लव कार्यकर्ताले स्थानीय तहका जनप्रतिनीधी र कर्मचारीहरुले एक महिनाको तलब दिनुपर्छ भनेर परिपत्रका साथै फोनबाट चन्दा मागेको स्थानीय तहका कर्मचारीहरुले जानकारी दिएका छन्।
विप्लव कार्यकर्ताहरुबाट गाउँमा आफुहरु असुरक्षित भएको भन्दै बिप्लव समुहको राजनीतिक समस्यालाई सरकारले समयमै समाधान गर्नुपर्ने जनप्रतिनिधिहरुको भनाई छ।
भर्खरै
लोकप्रिय
