साढे तीन महिनामै सिडिओ काज सरुवा

हुम्ला, सिमकोट – गृह मन्त्रालयले हुम्ला जिल्लाबाट साढे तीन महिनामै प्रमुख जिल्ला अधिकारी धोलकराज ढकालको काज सरुवा गरेको छ । गत चैत २० गते सरुवा भएर हुम्लामा पोष्टिङ भएका प्रजिअ ढकाल छोटो अवधीमै सरुवा भएका हुन् ।

सरुवा भएको पुष्टि गर्दै उनले आफ्नो काज सरुवा गृह मन्त्रालयमा भएको र हुम्लाका नयाँ प्रमुख जिल्ला अधिकारीका रुपमा बिनीता भट्टराईलाई जिम्मेवारी तोकिएको बताए ।

छोटो अवधी भए पनि जिल्लामा शान्ति सुरक्षा कायम गर्न र सबै पक्षसँग समन्वय गरेर अगाडि बढेको उनले बताए ।

केही दिन अगाडि शिक्षा, विकास तथा समन्वय इकाईमा भएको घटनामा सहयोग नगरेको भन्दै नेकपाको एक पक्ष उनको सरुवाका लागि लागिपरेको थियो । काज सरुवा भएकाले ढकालले तलब भत्ता भने हुम्लाबाटै खाने छन् ।