घरमै पार्किङ गरिएको कारमा आगजनी

धनगढी – कैलालीको गोदावरीमा पार्किङ गरेर राखेको कारमा अज्ञात समूहले आगजनी गरेको छ । बिहीबार राती घरको अगाडि पार्किङ गरेर राखेको अवस्थामा बा १५ च ४०९९ नम्बरको कारमा अज्ञात समूहले आगजनी गरेको जिल्ला प्रहरी कार्यालय कैलालीले जनाएको छ ।

जिल्लाको गोदावरी नगरपालिका–७ लालपुर बस्ने तिलकबहादुर शाहीले आफ्नै घर अगाडि खुल्ला ठाउँमा कार पार्किङ गरेका थिए ।

आगजनीका कारण कारको पछाडिको पुरै भाग जलेर नष्ट भएको प्रहरीले जनाएको छ । आगो कस्ले र किन लगायो भन्ने बारेमा अनुसन्धान भइरहेको जिल्ला प्रहरी कार्यालयका प्रहरी नावय उपरीक्षक दक्ष कुमार बस्नेतले बताए ।